ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓴᖅᑭᑕᐅᕙᓪᓕᐊᔪᑦ - ᔪᓚᐃ 20, 2020

ᒥᓂᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᒐᖅᑐᖅᖢᒍ ᓯᕗᓕᖅᑎᒧᑦ ᓄᑖᙳᕆᐊᖅᑎᑕᐅᔪᑦ:

ᐅᓪᓛᒃᑯᑦ. ᐅᓪᓗᒥ ᑐᓴᒐᒃᓴᖅᑕᖃᐅᕐᒪᑦ, ᓇᐃᓈᕐᓗᒋᑦ ᐅᖃᐅᓯᕆᓂᐊᖅᐸᒃᑲ.

ᓱᓕ ᒪᕐᕉᖕᓂᒃ ᓄᕙᒡᔪᐊᕐᓇᖅ-19−ᖃᕋᓱᒋᔭᐅᔪᖃᖅᑐᖅ ᓄᓘᔮᖕᓂᑦ ᖃᐅᔨᓴᕈᑎᖏᓐᓂᒃ ᐅᑕᖅᑭᑎᓪᓗᑕ ᖃᓪᓗᓈᓂᑦ.

ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 1629-ᖑᓕᖅᐳᑦ. 179-ᖑᓪᓗᑎᒃ ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᐱᓇᓱᐊᕈᓯᐅᓚᐅᖅᑐᒥᑦ ᑲᓇᑕᐅᑉ ᓯᕗᓕᖅᑎᖏᑦ ᒐᕙᒪᑐᖃᒃᑯᓪᓗ ᐱᔪᓐᓇᖅᑎᑦᑎᓚᐅᖅᐳᑦ ᑲᓇᑕᒥ ᐊᑦᑕᕐᓇᙱᑦᑐᒥᒃ ᐱᒋᐊᒃᑲᓐᓂᕐᓂᕐᒧᑦ ᐊᖏᕈᑎᒥᒃ.

ᓄᓇᕗᑦ $18.9 ᒥᓕᐊᓐᒧᑦ ᑎᑭᓪᓗᒍ ᐱᑎᑕᐅᓂᐊᖅᐳᑦ ᒐᕙᒪᑐᖃᒃᑯᓐᓂ ᐃᑲᔪᖅᑐᖅᑕᐅᓗᑎᒃ. ᑮᓇᐅᔭᓂᒃ ᓅᑎᑕᐅᔪᖃᕐᒥᓗᓂ $12.1−ᒥᓕᐊᓂᒃ, ᐊᒻᒪᓗ $5.7−ᒥᓕᐊᓂᒃ ᖃᐅᔨᓴᕐᓂᕐᒧᑦ ᑐᕌᖓᔪᓂᒃ ᐊᒻᒪ ᐃᒻᒥᓄᑦ ᓴᐳᒻᒥᔾᔪᑎᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐱᔭᐅᔪᓂᑦ. $1.1−ᒥᓕᐊᖑᓂᐊᕆᕗᑦ ᖃᓂᒪᔪᓄᑦ ᓄᖅᑲᖓᔾᔪᑎᓄᑦ ᑐᕌᖓᔪᓂᒃ ᓄᓇᕗᒻᒥᐅᓄᑦ ᐃᑲᔫᑎᒃᓴᓂᒃ, ᒐᕙᒪᑐᖃᒃᑯᑦ ᐱᓕᕆᐊᖏᓐᓄᑦ ᐊᐅᓚᑕᐅᓗᓂ.

ᓇᓗᓇᐃᔭᖅᓯᒪᒃᑲᓐᓂᖅᑐᓂᒃ ᖃᖓ ᐊᒻᒪ ᖃᓄᖅ ᑮᓇᐅᔭᖅᑖᕆᓂᐊᖅᑕᕗᑦ ᐱᔾᔪᑎᒋᓪᓗᒋᑦ ᐅᖃᐅᓯᐅᓵᓕᓂᐊᖅᐳᑦ, ᖁᕕᐊᓱᒃᐳᒍᓪᓗ ᒐᕙᒪᑐᖃᒃᑯᓐᓂ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᑦ ᐃᖅᑲᓇᐃᔭᖅᑎᖏᓐᓂᒃ ᐱᓕᕆᖃᑎᖃᕆᐊᒃᓴᖅ ᐱᓕᕆᐊᒃᓴᐅᓂᐊᓕᖅᑐᓂᑦ ᐅᑭᐅᖅᑕᖅᑐᒥᐅᓄᑦ ᑐᕌᖓᔪᓂᒃ ᐃᑲᔪᖅᑐᐃᔾᔪᑎᓂᒃ.

ᒥᓂᔅᑕ ᐋᓐᓂᐊᖃᖕᓇᙱᑦᑐᓕᕆᔨᒃᑯᑦ ᓄᑖᙳᕆᐊᖅᑎᑕᖏᑦ:

ᐱᕕᖃᕈᒪᕗᖓ ᐅᖃᐅᓯᖃᕈᒪᓪᓗᖓ ᓱᓕᙱᑦᑐᓂᒃ ᑐᑭᓯᓂᕐᓗᒃᓯᒪᔪᓂᓪᓗ ᒫᓐᓇ ᐅᐸᒃᑕᐅᑦᑕᐃᓕᒪᕝᕕᖕᓂ ᐊᑐᖅᑕᐅᔪᒥᒃ.

ᓄᓇᕗᑦ ᒐᕙᒪᒃᑯᑦ ᖃᔅᓯᑲᓪᓚᖕᓂᒃ ᐅᐸᒃᑕᐅᑦᑕᐃᓕᒪᕝᕕᖕᓂ ᐊᐅᓚᑦᑎᖃᑦᑕᖅᐳᑦ, ᐊᒻᒪ ᐅᓄᖅᑐᓂᒃ ᑐᒃᓯᕋᖅᑕᐅᔪᓂᒃ ᑲᒪᔭᕆᐊᖃᖅᐸᒃᖢᑎᒃ ᑕᒪᐃᓐᓂᒃ ᐊᓐᓂᐊᕐᕕᓕᐊᖅᖢᑎᒃ ᐊᐅᓪᓚᖅᐸᒃᑐᓂᒃ ᐊᒻᒪ ᐱᔭᕆᐊᖃᐊᓪᓚᕆᙱᖦᖢᑎᒃ ᐊᐅᓪᓚᖅᐸᒃᑐᓂᒃ. ᐃᓚᖏᑦ ᐅᖓᕙᕆᐊᖅᑕᐅᔭᕆᐊᖃᖅᐸᒃᑐᑦ ᐅᐸᒃᑕᐅᑦᑕᐃᓕᒪᕝᕕᖕᒧᐊᕆᐊᓖᑦ ᑲᒪᒋᔪᒪᓪᓗᒋᑦ, ᐃᖃᓗᐃᑦ ᖃᓄᖅᑑᕈᑕᐅᖃᑕᐅᓇᓱᓕᖅᐳᖅ ᐅᑕᖅᑭᑯᑖᓗᐊᖃᑦᑕᙱᓐᓂᖅᓴᐅᖁᓪᓗᒋᑦ ᐋᓐᓂᐊᕐᕕᓕᐊᖅᐸᒃᑐᑦ ᐅᐃᓂᐹᒡᒧᑦ.

ᓱᓕ ᑕᒪᓐᓇ ᐋᖅᑭᒃᑕᐅᕌᓂᙱᑉᐳᖅ ᐊᒻᒪ ᖃᐅᔨᓇᓱᓪᓚᕆᒃᖢᑕ ᐅᐸᒃᑕᐅᑦᑕᐃᓕᒪᕝᕕᒃᑲᓐᓂᐅᓇᔭᖅᑐᒥᑦ ᐅᐃᓂᐹᒡᒥ, ᐱᓗᐊᖅᑐᒥ ᐋᓐᓂᐊᕐᕕᓕᐊᖅᐸᒃᑐᓄᑦ. ᐱᓕᕆᔪᒪᓪᓚᑦᑖᖅᐳᒍᑦ ᐋᓐᓂᐊᕐᕕᓕᐊᖅᐸᒃᑐᑦ ᑲᒪᒋᔭᐅᑦᑎᐊᖃᑦᑕᖁᓪᓗᒋᑦ ᐊᒻᒪ ᓯᕗᓪᓕᐅᑎᖃᑦᑕᖅᐸᕗᑦ ᐅᐸᒃᑕᐅᑦᑕᐃᓕᒪᕝᕕᖕᒦᑎᓪᓗᒋᑦ ᑕᒪᒃᑯᓇᙵᑦ ᐱᔭᕆᐊᖃᓪᓚᕆᙱᖦᖢᑎᒃ ᐊᐅᓪᓚᖅᐸᒃᑐᓂᑦ.

ᑐᑭᓯᐅᒪᕗᒍᑦ ᐃᓱᓗᑕᐅᔪᓂᑦ ᐅᖃᐅᓯᐅᔪᖃᑲᑕᓚᐅᕐᒪᑦ ᖃᕆᓴᐅᔭᒃᑯᑦ ᐱᓇᓱᐊᕈᓯᐅᑉ ᓄᙳᐊᓂ. ᑭᓯᐊᓂ, ᓇᓗᓇᐃᖅᑕᐅᔪᖃᓚᐅᙱᒻᒪᑦ ᐃᖃᓗᖕᓂ ᐅᐸᒃᑕᐅᑦᑕᐃᓕᒪᕝᕕᒃᓴᐅᑉ ᒥᒃᓵᓄᑦ ᐅᕝᕙᓘᓐᓃᑦ ᐅᐃᓂᐹᒡᒥ ᐱᑕᖃᓕᒃᑲᓐᓂᕋᔭᕐᒪᖔᑦ. ᖃᐅᔨᒪᕗᒍᑦ ᓄᕙᒡᔪᐊᕐᓇᖅ-19 ᐱᓪᓗᒍ ᑲᑉᐱᐊᓇᕐᓂᖓᓂᒃ ᐊᒻᒪ ᓇᓗᓇᕐᓂᖓᓂ. ᑭᓯᐊᓂ, ᐊᔾᔨᒌᒃᑎᓐᓇᓱᒋᐊᖃᖅᐸᕗᑦ ᑲᐱᐊᓱᖕᓂᖅ ᓱᓕᔪᓄᑦ, ᑲᒪᒋᔭᐅᑦᑎᐊᕈᓐᓇᕐᓂᓕᒫᖏᓐᓂᒃ ᑲᒪᒋᔭᐅᓗᑎᒃ ᓄᓇᕗᒻᒥᐅᑦ ᐊᒻᒪ ᐱᓕᕆᔪᒪᓪᓚᑦᑖᕐᓂᑦᑎᓐᓄᑦ ᑭᒃᑯᑐᐃᓐᓇᑦ ᖃᓄᐃᙱᑦᑎᐊᖁᓪᓗᒋᑦ ᐊᑦᑕᕐᓇᙱᑦᑐᒦᖁᓪᓗᒋᓪᓗ.

ᑕᒪᓐᓇ ᑲᒪᒋᔭᐅᓪᓚᑦᑖᕐᓂᐊᓕᖅᐸᑦ, ᑐᓴᖅᑎᑦᑎᓛᖅᐳᒍᑦ ᑕᒪᑐᒪ ᒥᒃᓵᓄᑦ ᑐᑭᓯᒋᐊᖅᑎᑦᑎᓗᑕ. ᐱᓕᕆᐊᖑᔪᒥᒃ ᐱᐊᓂᒐᓱᒃᑎᓪᓗᑕ, ᖁᔭᓐᓇᒦᕈᒪᔭᕗᑦ ᑕᐃᒃᑯᐊ ᐅᐸᒃᑕᐅᑦᑕᓕᒪᕝᕕᖕᒥ ᐃᓂᒃᓴᒥᓂᒃ ᐅᑕᖅᑭᑦᑎᐊᖅᑐᑦ ᕿᓄᐃᓵᕈᓐᓇᕐᒪᑕ ᑐᑭᓯᐊᑦᑎᐊᖅᖢᑎᒡᓗ. ᐅᓪᓗᓕᒫᑦᑎᐊᖅ ᐱᓕᕆᖃᑦᑕᖅᑐᒍᑦ ᐅᑭᐅᖅᑕᖅᑐᒥᐅᑦ ᓄᓇᕗᒻᒥᐅᓪᓗ ᐊᑦᑕᕐᓇᙱᑦᑐᒦᖁᓪᓗᒋᑦ. ᖁᔭᓕᔪᒪᕙᒃᑲ ᐃᖃᓇᐃᔭᕐᑏᑦ ᐱᓕᕆᓯᒪᓪᓚᕆᒃᑐᑦ ᖃᓄᐃᖏᑦᑕᐃᓕᒪᓂᕐᒧᑦ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ−19.

ᒥᓂᔅᑕ ᐱᕙᓪᓕᐊᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᓄᑖᙳᕆᐊᑕᖏᑦ:

ᖃᓄᐃᑦᑐᓐᓃᖅᐸᓪᓕᐊᓂᕐᒧᑦ ᐊᓂᒍᐃᑦᑎᐊᕈᓐᓇᕐᓂᕐᒧᓪᓗ ᐸᕐᓇᐅᑎᒧᑦ ᐃᓚᒋᔭᐅᓪᓗᓂ ᐳᓚᕋᖅᑐᓕᕆᔨᓄᑦ ᐱᖅᑯᓯᓕᕆᔨᓄᓪᓗ, ᖁᕕᐊᓱᒃᐳᖓ ᑐᓴᖅᑎᑦᑎᔭᕆᐊᒃᓴᖅ ᐆᒥᖓ ᓴᖅᑭᑎᑕᐅᓚᐅᖅᑐᒥᒃ ShopNunavut.ca, ᐸᕐᓇᐅᑎ ᓇᓗᓇᐃᖅᓯᓪᓗᓂ ᓄᓇᓕᖕᓂ ᓂᐅᕕᐊᒃᓴᓂᑦ, ᐱᔨᑦᑎᕋᐅᑎᓂᑦ, ᐊᒻᒪ ᐱᓕᕆᐊᖑᖃᑦᑕᖅᓯᒪᔪᓂᑦ ᓄᓇᕗᒻᒥᐅᓄᑦ ᐊᑐᐃᓐᓇᐅᑎᑕᐅᔪᓂᒃ.

ᐱᓕᕆᖃᑎᒌᒃᑐᓄᑦ ᓴᖅᑭᑎᑕᐅᓪᓗᓂ ᓄᓇᕗᒻᒧᑦ ᑎᑭᐅᑎᓇᓱᐊᖅᑎᓄᑦ, ᓄᓇᕗᒻᒥ ᐊᐅᓪᓚᖅᐸᒃᑐᑦ ᐊᒻᒪ ᓄᓇᕗᒻᒥ ᐱᕙᓪᓕᐊᔪᓕᕆᔨᒃᑯᑦ ᑲᑐᔾᔨᖃᑎᒌᑦ, ShopNunavut.ca ᓄᓇᕗᒻᒥ ᒥᑭᑦᑐᓂᒃ ᓇᖕᒥᓂᓕᖕᓄᑦ ᐊᒻᒪ ᐳᓚᕋᖅᑐᓕᕆᔨᓄᑦ ᓄᓇᕗᒻᒥ ᐃᑲᔫᑕᐅᓇᓱᒃᐳᖅ ᓄᕙᒡᔪᐊᕐᓇᖅ-19 ᖃᓂᒪᓐᓇᖅ ᐊᑐᖅᖢᒍ, ᓂᐅᕕᕐᕕᖕᒥᒃ ᐅᐸᒃᑕᕐᕕᖕᒥᒃ ᓴᖅᑭᑎᑦᑎᓪᓗᑎᒃ ᐊᔾᔨᒌᙱᑦᑐᓂᒃ ᓂᐅᕕᐊᒃᓴᓕᖕᓄᑦ ᐱᔨᑦᑎᕋᐅᑎᓕᖕᓄᓪᓗ ᓄᓇᕗᒻᒥᐅᓕᒫᓄᑦ ᐊᑐᐃᓐᓇᐅᔪᓂᑦ. ᐸᕐᓇᐅᑎ ᐃᖏᕐᕋᓂᐊᖅᐳᖅ 2020 ᓄᙳᐊᓄᑦ ᑎᑭᓪᓗᒍ.

ShopNunavut.ca−ᒦᓕᕈᑎᒃ, ᓄᓇᕗᒻᒥᐅᑦ ᐊᔾᔨᒌᙱᑦᑐᓂᒃ ᐱᔨᑦᑎᕋᐅᑎᓂᒃ ᐊᑐᕈᓐᓇᕐᓂᐊᖅᐳᑦ ᓲᕐᓗ ᐅᑯᓂᖓ: StayNunavut, ᑐᑭᓯᒋᐊᕈᑎᒃᓴᓂᒃ ᓴᖅᑭᑎᑦᑎᕙᒃᑐᑦ ᓄᓇᕘᓕᒫᒥ ᐃᓂᒋᔭᐅᔪᓐᓇᖅᑐᓂᒃ; EatNunavut - ᓂᕆᕝᕖᑦ ᐊᑕᖏᖅᖢᒋᑦ ᑎᑎᕋᖅᓯᒪᔪᑦ; ᐊᒻᒪ ᑐᑭᓯᒋᐊᕈᑎᒃᓴᑦ ᐳᓚᕋᖅᑐᓕᕆᔨᑦ ᐊᐅᓚᑦᑎᔨᖏᓐᓂᒃ, ᐊᐅᓪᓚᕈᔾᔨᔨᓂᑦ, ᓴᓇᙳᐊᖅᑎᓂᒃ ᐊᒻᒪ ᒥᖅᓱᖅᑎᓂᒃ ᐃᓄᖕᓂᒃ EnjoyNunavut−ᑯᑎᒍᑦ.

ShopNunavut.ca−ᒥᑦᑕᐅᖅ, ᓄᓇᕗᒻᒥᐅᑦ ᐊᑐᕈᓐᓇᕐᓂᐊᖅᐳᑦ ᖁᕕᐊᓇᖅᑐᒥᒃ ᓄᑖᖑᓪᓗᓂ ᐃᑭᐊᖅᑭᕕᒃᑰᕈᑎᒥᒃ ᓄᓇᕗᒻᒥ ᐊᐅᓪᓚᖅᐸᒃᑐᓄᑦ ᓴᖅᑭᑕᐅᓯᒪᔪᒥᒃ. StaycationNunavut.ca ᓴᖅᑭᑎᑦᑎᕗᑦ ᓄᑖᙳᕆᐊᖅᓯᒪᔪᒥᒃ ᐊᐅᓪᓚᕐᓂᐊᖅᑐᓄᑦ ᐱᕙᒌᔭᖅᑐᓄᑦ ᐃᑲᔫᑎᒃᓴᓂᒃ ᐊᒻᒪ ᑐᑭᓯᒋᐊᕈᑎᒃᓴᓂᒃ ᖃᓄᖅ ᐳᓚᕋᖅᑐᓕᕆᓂᕐᒧᑦ ᐱᕕᒃᓴᕆᔭᐅᔪᑦ ᐱᑕᖃᕐᒪᖔᑕ ᓄᓇᕘᓕᒫᒥ. ᐃᑭᐊᖅᑭᕕᒃᑯᑦ ᐃᓂᒃᓴᒥᒃ ᓴᖅᑭᑎᑦᑎᓂᐊᕆᕗᑦ ᓄᓇᕗᒻᒥ ᐳᓚᕋᖅᑐᓕᕆᔨᑦ ᐊᐅᓚᑦᑎᔨᖏᓐᓄᑦ ᑕᑯᒃᓴᐅᑎᑦᑎᖁᓪᓗᒋᑦ ᐊᒻᒪ ᒪᓂᓴᐅᑎᖃᕐᓗᑎᒃ ᓄᑖᓂᒃ ᑲᑎᖅᓱᖅᓯᒪᔪᓂᑦ ᐊᑐᐃᓐᓇᐅᑎᑕᐅᔪᑦ ᓴᓇᓯᒪᓪᓗᑎᒃ ᓄᓇᓕᖕᓂ ᐅᑭᐅᖅᑕᖅᑐᒥᓪᓗ ᓈᓚᒃᑎᖏᓐᓄᑦ.

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑭᒡᒐᖅᑐᖅᖢᒋᑦ ᐱᓕᕆᖃᑎᒋᕙᒃᑕᕗᓪᓗ, ᓄᓇᕗᒻᒥ ᑎᑭᐅᑎᓇᓱᐊᖅᑎᑦ, ᓄᓇᕗᒻᒥ ᐊᐅᓪᓚᖅᐸᒃᑐᑦ, ᐊᒻᒪ ᓄᓇᕗᒻᒥ ᐱᕙᓪᓕᐊᔪᓕᕆᔨᑦ ᑲᑐᔾᔨᖃᑎᒌᖏᑦ, ᓄᓇᓕᖕᒥᐅᓕᒫᑦ ᐊᑐᖁᕙᒃᑲ ᐱᕕᒃᓴᕆᑎᑕᐅᔪᒥᒃ ShopNunavut.ca−ᒥᓗ ᐊᑐᖃᑦᑕᕐᓗᑎᒃ ᓄᓇᓕᖕᓂ ᓂᐅᕕᕐᓂᐊᕐᓗᑎᒃ, ᓄᓇᓕᖕᓂ ᓂᕆᓂᐊᕐᓗᑎᒃ ᐊᒻᒪ ᐃᓚᒋᔭᐅᓗᑎᒃ ᓄᓇᓕᖕᓂ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᒃᓴᖏᓐᓂᒃ ᐊᑐᐃᓐᓇᐅᔪᓂᑦ.

ᐃᕝᕕᑦᑕᐅᖅ ᐃᓚᒋᔭᐅᖁᕙᒋᑦ ᐱᓇᓱᐊᕈᓯᑕᒫ ᓵᓚᒃᓴᕋᓱᒃᑎᑕᐅᔪᓂᑦ ᔪᓚᐃ 27-ᒥ ᐱᒋᐊᕐᓗᓂ ShopNunavut ᖃᕆᓴᐅᔭᒃᑯᑦ ᒪᒃᐱᖅᑐᒐᖓᓂ ᐊᑐᐃᓐᓇᐅᓂᐊᖅᖢᓂ Instagram−ᑯᓪᓗ. ᐱᓇᔪᒃᑕᐅᒋᐊᓖᑦ ᐊᔾᔨᒌᖃᑦᑕᔾᔮᙱᑉᐳᑦ ᐱᓇᓱᐊᕈᓯᑕᒫ ᓵᓚᒃᓴᐅᓯᐊᒃᓴᐃᓪᓗ ᑐᓐᓂᖅᑯᑕᐅᕙᒡᓗᑎᒃ ᐊᑐᓂ ᓄᓇᓕᖕᓂ.

ᐊᐅᓪᓚᖃᑎᖃᕆᑦ ᓄᓇᓕᖕᓂ ᖃᐅᔨᒪᔨᑕᕐᓂᑦ ᐃᓕᓐᓂᐊᕐᕕᒋᓗᒋᓪᓗ ᐃᓄᐃᑦ ᐃᓕᖅᑯᓯᖏᓐᓂᒃ. ᐆᒪᔪᓂᒃ ᐊᒻᒪ ᑲᔾᔮᕐᓇᖅᑐᒥᒃ ᓄᓇᒥᒃ ᑕᑯᔭᖅᑐᕐᓗᑎᑦ ᐊᔾᔨᖃᙱᑦᑐᒥᓪᓗ ᓄᓇᕗᒻᒥ ᐊᑐᐃᓐᓇᐅᔪᓂᑦ. ᓄᓇᓕᖕᓂ ᐊᖑᔭᐅᓯᒪᔪᓂᒃ ᓂᕿᓪᓚᑦᑖᓂᒃ ᓂᐅᕕᕈᓐᓇᖅᐳᑎᑦ ᐃᑲᔪᖅᑐᐃᓗᑎᓪᓗ ᓄᓇᓕᖕᓂ ᓴᓇᙳᐊᖅᑎᓂᒃ ᓄᓇᕗᒻᒥ ᓴᓇᔭᐅᓯᒪᔪᓂᑦ ᓂᐅᕕᕐᓗᑎᑦ ᐃᒡᓗᓯ, ᑎᑎᕋᕐᕕᓯ ᐊᒻᒪ ᓇᖕᒥᓂᕆᔭᐃᑦ ᐱᐅᓯᒋᐊᖁᓪᓗᒋᑦ.

ᓄᓇᓕᖕᓂ ᓇᖕᒥᓂᓖᑦ ᑲᔪᓰᓐᓇᕈᑕᐅᔪᓐᓇᖅᐳᑦ ᓄᓇᑦᑎᓐᓂ, ᑮᓇᐅᔭᓕᐅᕈᑎᒃᓴᑦᑎᓐᓂ ᐱᓕᕆᐊᒃᓴᖃᓪᓚᕆᒃᐳᑎᑦ ᐊᒻᒪ ᐃᓕᖅᑯᓯᑐᖃᖅᐳᑦ ᐱᖅᑯᓯᖅᐳᓪᓗ ᐆᒪᑏᓐᓇᕋᓱᒡᓗᒋᑦ ᖁᕕᐊᓲᑎᒋᓗᑎᒍᑦ. ShopNunavut ᐃᑲᔪᕐᓂᐊᖅᐳᑎᓪᓗ ᓄᓇᓕᖕᓂ ᓇᖕᒥᓂᓕᖕᓂᑦ ᖃᕝᕙᖅᐸᓪᓕᐊᑎᓪᓗᒋᑦ. ᓇᑯᕐᒦᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖓᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᕐᓂᕆᕙᒃᑕᖏᓐᓄᑦ

ᐅᖃᓗᒃᐸᒌᖕᓂᖅ ᐋᓐᓂᐊᕕᖕᓄᑦ

ᑭᓯᐊᓂ ᑐᐊᕕᕐᓇᖅᑐᒃᑯᑦ ᐋᓐᓂᐊᓕᕈᕕᑦ, ᐅᖃᓗᖅᑳᕆᑦ ᐋᓐᓂᐊᕕᖕᒧᑦ ᐅᐸᓚᐅᙱᓐᓂᕐᓂᑦ. ᐅᖃᐅᓯᕆᓗᒋᑦ ᖃᓄᐃᓐᓂᕆᔭᑎᑦ, ᐋᓐᓂᐊᓯᐅᑎᓪᓗ ᐅᖃᓘᑎᒃᑯᑦ ᖃᐅᔨᓴᕈᓐᓇᖅᑐᑦ ᐃᓂᒃᓴᓕᐅᕈᓐᓇᖅᖢᑎᒡᓗ ᐃᓅᓕᓴᐃᑦᑎᐊᕐᓂᐊᕐᓗᑎᒃ.

ᒪᑐᐊᖅᓯᒪᖃᑦᑕᕐᓂᖅ ᐋᓐᓂᐊᕕᖕᓂᑦ

ᐋᓐᓂᐊᕕᓕᐊᕈᕕᑦ ᐊᓂᕐᓂᕐᓄᑦ ᐱᔾᔪᑎᖃᕐᓗᑎᑦ ᓲᕐᓗ ᖁᐃᖅᓱᑲᑕᒡᓗᑎᒃ, ᑕᒋᐅᒃᓴᑲᑕᒡᓗᑎᒃ, ᑲᒃᑭᓕᑲᑕᒡᓗᑎᓪᓘᓐᓃᑦ, ᒪᑐᐊᖅᓯᒪᔭᕆᐊᖃᖅᐳᑎᑦ. ᒪᑐᐊᒃᓴᖃᙱᒃᑯᕕᑦ, ᐅᖃᐅᑎᓂᐊᖅᐸᑦ ᑕᑯᔭᑦ ᐋᓐᓂᐊᕕᖕᒥᑦ ᖃᓄᐃᓐᓂᕆᔭᕐᓂᒃ, ᑐᓂᔭᐅᔪᓐᓇᕐᓂᐊᖅᐳᑎᓪᓗ.

ᓄᑖᖅ ᖃᕆᑕᐅᔭᒃᑯᑦ ᑎᑎᕋᕐᕕᐅᔪᓐᓇᖅᑐᖅ ᓄᒃᑕᖅᑎᓄᑦ

ᓄᑖᒥᒃ ᖃᕆᑕᐅᔭᒃᑯᑦ ᑐᕌᕈᑎᒥᒃ ᐋᖅᑭᒃᓯᔪᖃᖅᓯᒪᕗᖅ ᓄᓇᕗᒻᒥᐅᓄᑦ ᐊᐅᓪᓚᕈᒪᓂᐊᖅᑐᓄᑦ ᐊᕕᒃᓯᒪᓂᖓᑕ ᐅᑭᐅᖅᑕᖅᑐᒥ ᓯᓚᑕᓄᑦ. ᑕᒪᕐᒥᑦᑎᐊᖅ ᓄᒃᑕᖅᑐᑦ ᑐᓂᓯᔭᕆᐊᖃᖅᐳᑦ ᐅᐸᒃᑕᐅᑦᑕᐃᓕᒪᓂᕐᒧᑦ ᑎᑎᕋᕆᐊᓕᖕᒥᒃ ᐅᑯᓄᖓ, @email ᖃᐅᔨᒪᓕᑐᐊᕈᑎᒃ ᐊᐅᓪᓚᕐᕕᒃᓴᐃᑦ ᐸᕐᓇᒃᑕᐅᓯᒪᓕᕐᓂᖓᓂᒃ, ᐊᐅᓪᓚᖅᑐᓕᕆᔨᑦ ᐱᓕᕆᔨᖏᑦ ᓇᓗᓇᐃᖅᓯᔪᓐᓇᖁᓪᓗᒋᑦ ᐃᒡᓗᕈᓯᕐᒥᒃ ᒪᓂᒪᔪᖃᕐᒪᖔᑦ ᐃᓂᒃᓴᓕᐅᕐᓗᑎᒡᓗ ᐃᓂᒋᓂᐊᖅᑕᒥᓂᒃ ᓇᓗᓇᐃᖅᑕᐅᓯᒪᔪᓂ ᐅᐸᒃᑕᐅᑦᑕᐃᓕᒪᕝᕕᖕᒥ. ᑐᑭᓯᒋᐊᕈᑎᒃᓴᒃᑲᓐᓃᑦ ᓇᓂᔭᐅᔪᓐᓇᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑭᐊᖅᑭᕕᖓᓂ.

ᐅᐸᒃᑕᐅᑦᑕᐃᓕᒪᕝᕕᐅᔪᓂ ᐃᓱᒫᓘᑎᖃᕈᕕᑦ ᐴᒃᓴᖅ

ᓄᑖᒥᒃ ᖃᕆᑕᐅᔭᒃᑯᑦ ᑐᕌᕈᑎᒥᒃ ᐋᖅᑭᒃᓯᓯᒪᔪᖃᓕᖅᐳᖅ ᑭᐅᔭᐅᑦᑎᐊᕐᓂᖅᓴᐅᖃᑦᑕᖁᓪᓗᒋᑦ ᐃᓱᒫᓘᑎᖃᖅᑐᑦ ᐅᖃᐅᓯᐅᓯᒪᔪᓪᓗ ᑲᒪᒋᔭᐅᕌᓂᒃᑐᓂᑦ ᐅᓪᓗᓂᑦ 14−ᓂᑦ ᐅᐸᒃᑕᐅᑦᑕᐃᓕᒪᕝᕕᖕᒦᑦᑐᓂᑦ ᖃᓪᓗᓈᓂ ᑲᓇᑕᒥ. ᑖᓐᓇ ᓄᑖᖅ ᖃᕆᑕᐅᔭᒃᑯᑦ ᑎᑎᕋᕐᕕᒃ ᐊᒃᓱᕈᓐᓇᕈᓐᓃᖅᑎᑦᑎᓂᐊᖅᐳᖅ ᓄᕙᒡᔪᐊᕐᓇᒧᑦ ᐊᑭᖃᙱᑦᑐᒧᑦ ᐅᖄᓚᕝᕕᒃᓴᐅᕙᒃᑐᒧᑦ, ᐃᓗᐊᖅᓴᖅᑕᐅᔭᖅᑐᖅᓯᒪᔪᓂᒃ ᐋᓐᓂᐊᕐᕕᓕᐊᖅᓯᒪᔪᓂᑦ ᑭᒡᒐᖅᑐᐃᔨᓂᑦ ᐊᒻᒪᓗ CPHOTravelRequests ᐃᓕᐅᖅᑲᐃᕝᕕᒋᑎᑉᐸᒃᑕᖓᓄᑦ. ᐅᕝᕙ ᓄᑖᖅ ᑐᕌᕈᑖ @email.

ᐅᓄᕐᓂᖏᑦ

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᐅᑎᑦ

ᔪᓚᐃ 18−ᒥ ᐱᒋᐊᖅᖢᓂ, 2730−ᓂᒃ ᑐᒃᓯᕋᖅᑐᖃᓚᐅᖅᐳᖅ, 1757−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᕈᑕᐅᔪᑦ.

ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ. ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.

ᔫᓂ 8−ᒥᑦ ᐱᒋᐊᖅᖢᓂ, ᐅᓄᕐᓂᖅᓴᓂᒃ ᐊᑐᐃᓐᓇᐅᔪᖃᖃᑦᑕᕐᓂᐊᓕᖅᐳᖅ ᐅᐸᒍᑎᓗᑎᒃ ᖃᓄᐃᓐᓂᖏᓐᓂᒃ ᖃᐅᔨᓴᖅᑕᐅᔪᒪᔪᓄᑦ ᐋᓐᓂᐊᕕᖕᓂ ᐅᑭᐅᖅᑕᖅᑐᓕᒫᒥ.

• ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
• ᓄᑕᕋᓛᑦ ᖃᓄᐃᙱᑦᑐᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᓱᓕ ᑲᔪᓯᕗᑦ ᓄᓇᕘᓕᒫᒥ.
• ᓘᒃᑖᑦ ᓄᓇᓕᖕᓄᑦ ᐳᓚᕋᖃᑦᑕᖅᑐᑦ ᑲᔪᓰᓐᓇᕐᓂᐊᖅᐳᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.
• ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.

ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᑕᒪᕐᒥᑦᑎᐊᖅ ᑕᑯᔭᒃᓴᓕᐊᖑᓯᒪᔪᑦ ᐃᓂᒃᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.

ᐋᓐᓂᐊᕐᕕᖕᒧᑦ ᐅᓂᒃᑐᑦ ᕿᑭᖅᑕᓂ ᐋᓐᓂᐊᕕᖕᒥ ᖃᔅᓰᓐᓇᕐᓂᒃ ᐳᓛᖅᑕᐅᑎᑦᑎᑲᑕᒃᑐᑦ ᐊᐱᖅᓱᖅᑕᐅᑲᑖᓪᓚᓚᐅᖅᖢᑎᒃ.

MHA−ᑯᑦ ᐅᖄᓚᐅᑎᒃᑯᖔᖅ ᖃᐅᔨᓴᖅᑕᐅᖃᑦᑕᕐᓂᐊᓕᖅᑐᑦ ᐃᑲᔪᖅᑕᐅᖃᕐᓗᑎᓪᓗ ᐃᓚᖏᓐᓄᑦ ᐃᓄᓕᕆᔭᐅᖃᑦᑕᖅᑐᓄᑦ. ᑕᑯᔭᒃᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᒃᓯᕆᐊᓖᑦ ᐊᒻᒪ ᐱᓕᕆᖃᑦᑕᕐᓂᕆᕙᒃᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ. ᐊᖏᕐᕋᕆᔭᐅᔪᓂ ᐅᐸᒃᐸᒃᑐᑦ ᐃᓗᐊᖅᓴᐃᔭᖅᑐᕐᓗᓂ ᐱᓕᕆᐊᖑᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ ᑕᐃᒪᐃᓕᐅᕆᐊᖃᖅᐸᑕ.

ᔫᓂ 15-ᒥ ᐱᒋᐊᕐᓗᓂ, ᑭᒍᑎᓕᕆᔨᒃᑯᑦ ᐅᒃᑯᐃᕈᓐᓇᖅᓯᓂᐊᓕᖅᑐᑦ, ᑕᒪᓐᓇ ᐱᔨᑦᑎᕋᐅᑎ ᐃᕐᙲᓐᓇᖅ ᐊᑐᐃᓐᓇᐅᙱᑐᐃᓐᓇᕆᐊᓖᑦ ᓄᓇᓕᓕᒫᓂ. ᓄᓇᓕᖕᓄᑦ ᐱᔨᑦᑎᕋᐅᑎᑦ ᑭᖑᕙᓯᖕᓂᐊᖅᑐᓄᑦ ᐱᔨᑦᑎᕋᕐᓂᐅᔪᓄᑦ, ᑐᐊᕕᕐᓇᖅᑐᒃᑯᑦ ᐱᔨᑦᑎᕋᐅᑎᑦ ᓱᓕ ᐊᑐᐃᓐᓇᐅᕗᑦ.

ᔫᓂ 29−ᒥ ᐱᒋᐊᕐᓗᓂ, ᓄᓇᕗᒻᒥ ᑲᒪᒋᔭᐅᖏᓐᓇᖅᑐᒃᑯᕖᑦ ᐃᓐᓇᐃᓪᓗ ᐊᖏᕐᕋᖏᑦ ᐳᓛᕆᐊᖅᑕᐅᔪᓐᓇᕐᓂᐊᖅᐳᑦ ᑭᒡᓕᖃᖅᑎᑕᐅᕙᒡᓗᑎᒃ. ᐊᑐᓂᑦ ᑕᒪᐃᑕ ᑕᐃᑲᓂᕐᒥᐅᑦ ᐅᓂᒃᓯᒪᔪᓪᓘᓐᓃᑦ ᒪᕐᕉᒃ ᐅᖓᑖᓂ ᐳᓛᖅᑎᖃᕆᐊᖃᙱᓚᑦ ᐊᑕᐅᑦᑎᒃᑯᑦ ᑕᒪᒃᑯᐊᓗ ᐳᓛᕆᐊᖅᑐᑦ ᐃᓱᓕᑦᑕᖅᑎᑕᐅᓂᐊᖅᐳᑦ ᐃᓚᒋᔭᐅᔪᓄᑐᐊᖅ, (ᑕᒪᓐᓇ ᐃᓚᖃᖅᖢᓂ ᐃᕐᙳᑕᕐᓂᒃ ᐊᔭᐅᑉᐱᐊᓂᒡᓗ.

ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ:

ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᖃᐅᔨᓇᓱᒃᖢᑎᒃ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.

ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᓂᐅᓕᖅᐳᑦ 2020-21−ᒥ ᐅᒃᑯᐃᖅᑕᐅᕝᕕᒃᓴᖓᓄᑦ ᐸᕐᓇᐅᑎᒥᒃ ᓄᓇᕗᒻᒥ ᐃᓕᓐᓂᐊᕐᕕᖕᓄᑦ ᑐᕌᖓᔪᒥᒃ ᔪᓚᐃ ᓄᙳᐊᓂ.

ᐃᖅᑲᓇᐃᔭᖅᑎᕗᑦ ᐃᓕᓐᓂᐊᖅᑎᕗᓪᓗ ᐊᑦᑕᕐᓇᖅᑕᐃᓕᒪᓂᖏᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓯᕗᓪᓕᐅᔾᔭᐅᕗᖅ. ᐱᓕᕆᖃᑎᒌᑦᑎᐊᕐᓂᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᑐᑭᓯᓇᑦᑎᐊᖅᑐᓂᒡᓗ ᐊᑐᖅᑕᐅᔭᕆᐊᖃᕐᓗᓂ ᐋᓐᓂᐊᖅᑕᐃᓕᒪᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ, ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᖅᑎᖁᑎᑦᑎᓐᓂ ᐃᓕᓐᓂᐊᖁᔨᕗᑦ ᐊᑦᑕᕐᓇᙱᑦᑐᒥᑦ, ᐃᑲᔪᖅᑐᐃᔪᒥᓪᓗ.

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᒪᓕᒐᖅᑎᒍᑦ ᓇᓗᓇᐃᖅᓯᔨᑦ ᑎᑎᕋᕐᕕᖓ ᐅᒃᑯᐃᒃᑲᓐᓂᓛᓕᖅᐳᖅ ᑭᒃᑯᑐᐃᓇᓄᑦ ᐊᑐᖅᑕᐅᔪᓐᓇᖅᓯᓗᓂ ᓇᒡᒐᔾᔭᒥ, ᔪᓚᐃ 20-ᒥ ᐱᒋᐊᕐᓗᓂ. ᐊᑕᐅᓯᕐᒥᒃ ᐃᓄᖕᒥᒃ ᐊᑐᖅᑕᐅᔪᓐᓇᕐᓗᓂ.

ᐱᔨᑦᑎᕋᖅᑕᐅᔪᓕᒫᑦ ᑭᒡᓕᒋᑎᑕᐅᔪᓂᒃ ᓈᓚᑲᑕᒡᔫᒥᖁᔭᐅᔪᑦ ᐅᖓᓯᒌᒃᑕᑲᑕᐃᓐᓇᕐᓗᑎᒡᓗ 2 ᒦᑕ (6 ᐃᓯᒃᑲᓄᑦ). ᐱᔨᑦᑎᕋᖅᑕᐅᔪᑦ ᐅᖃᓗᖃᑦᑕᖁᔭᐅᕗᑦ 1-867-975-6590−ᒧᑦ ᐅᕝᕙᓘᓐᓃᑦ ᐃᕐᖐᓐᓈᖅᑕᐅᒃᑯᑦ ᑎᑎᕋᕐᕕᒋᓗᒋᑦ ᐅᕗᖓ @email ᐊᐱᖅᑯᑎᒃᓴᖃᑐᐊᕈᔅᓯ ᐃᓱᒫᓘᑎᖃᑐᐊᕈᔅᓯᓘᓐᓃᑦ ᒪᓕᒐᖅᑎᒍᑦ ᓇᓗᓇᐃᖅᓯᔨᑦ ᐱᔨᑦᑎᕋᐅᑎᖏᓐᓄᑦ. ᑐᑭᓯᒋᐊᒃᑲᓐᓂᕈᒪᒍᕕᑦ, ᒪᓕᒐᖅᑎᒍᑦ ᓇᓗᓇᐃᖅᓯᔨᑦ ᐃᑭᐊᖅᑭᕕᖓᓐᓄᐊᕐᓗᓯ ᖃᐅᔨᒋᐊᕈᓐᓇᖅᐳᓯ ᐅᓇ ᓇᕿᓪᓗᒍ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᑐᒃᓯᕋᐅᑎᑦ ᐅᑭᐅᖅᑕᖅᑐᒧᐊᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ ᐊᐅᓪᓚᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ, ᐃᕐᙲᓐᓈᖅᑕᐅᒃᑯᑦ ᓇᓂᔭᐅᔪᓐᓇᖅᐳᖅ ᐅᕙᓂ,  @email

ᐃᒡᓗᓕᐅᖅᑏᑦ ᐱᔭᕇᖅᓯᔪᑦ ᐅᐸᒃᑕᐅᑦᑕᐃᓕᒪᕝᕕᖕᒥ ᒫᓐᓇᒧᑦ ᑎᑭᖦᖢᒍ: 624

ᓄᓇᕗᑦ ᒐᕙᒪᒃᑯᑦ ᑎᑎᕋᕐᕕᖏᑦ ᓄᓇᓕᖕᓂ ᑕᒪᐃᓐᓂᒃ ᓱᓕ ᒫᓐᓇ ᒪᑐᓯᒪᕗᑦ ᑭᒃᑯᑐᐃᓐᓇᓄᑦ ᐅᐸᒃᑕᐅᔪᓐᓇᙱᖦᖢᑎᒃ ᒫᓐᓇᐅᔪᒃᑯᑦ. ᑭᓇᑐᐃᓐᓇᒥᒃ ᑕᖅᑳᙵᑐᐃᓐᓇᖅ ᑲᑎᖃᑎᖃᕆᐊᖃᖅᑐᖃᖅᐸᑦ ᓄᓇᕗᑦ ᒐᕙᒪᖓᑕ ᐊᑐᕆᐊᖃᓪᓚᕆᒃᑐᓂᒃ ᐱᔨᑦᑎᕋᕐᕕᖃᕐᓂᕐᒧᑦ ᐃᖅᑲᓇᐃᔭᖅᑎᒥᒃ, ᐊᓯᐊᒍᖔᖅ ᐋᖅᑭᒃᓱᖅᑕᐅᔪᓂᒃ ᐋᖅᑭᒃᓱᖅᑕᐅᔪᖃᕆᐊᖃᖅᐳᖅ. ᐅᖄᓚᖅᑳᕐᓂᐊᖅᐳᑎᑦ ᓯᕗᓂᑲᓪᓚᖓᒍᑦ ᐃᓂᒃᓴᓕᐅᕐᓗᑎᓪᓗ.

ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐊᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐅᓕᒪᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᕕᑦ.