ᐱᔨᑦᓯᕋᐅᑎᓕᒃ ᕿᒥᕐᕈᓂᖅ ᓇᔭ ᐃᓴᐱᐅᓪ ᐱᒡᒐᖅᑐᓄᑦ ᐊᖏᕐᕋᕆᔭᐅᔪᒥ
ᒫᒍᓚ ᓇᑲᓱᒃ, ᒥᓂᔅᑕ ᐃᓄᓕᕆᔨᒃᑯᓐᓄᑦ, ᐅᓪᓗᒥ ᐅᑯᓂᖓ ᓇᓗᓇᐃᕈᑎᖃᖅᑲᐅᔪᖅ ᐱᔾᔪᑎᒋᓪᓗᒍ ᐃᓱᒫᓗᓐᓇᖅᑐᓂᒃ ᖃᓄᐃᓕᔪᖃᖅᑐᒥᓂᐅᑎᓪᓗᒍ ᓇᔭ ᐃᓴᐱᐅᓪ ᐊᖏᕐᕋᕆᔭᐅᑎᑕᐅᔪᒥ ᐃᒡᓗᓕᒑᕐᔪᒃ, ᓄᓇᕗᒻᒥ.
“ᐃᓄᓕᕆᔨᒃᑯᑦ ᖃᐅᔨᓴᖅᑐᑦ ᐊᑐᐃᓐᓇᐅᑎᑕᐅᕙᑦᑐᓂᒃ ᐃᑉᐱᒋᔭᖃᖃᑦᑕᓂᕐᒧᑦ ᓇᔭ ᐃᓴᐱᐅᓪ ᐊᖏᕐᕋᕆᔭᐅᑎᑕᐅᔪᒥ, ᐱᒡᒐᕈᑎᓕᓐᓄᑦ ᐊᖏᕐᕋᕆᔭᐅᔪᖅ ᐃᒡᓗᓕᒑᕐᔪᒻᒥᒃ ᓱᕈᓯᕐᓄᑦ ᐃᓐᓇᕐᓄᓪᓗ ᐃᑉᐱᒋᐅᖏᓐᓇᕆᐊᓕᓐᓄᑦ ᑎᒥᒥᒍᑦ ᐊᔪᕈᑎᓕᓐᓄᑦ. ᐊᖏᕐᕋᕆᔭᐅᑎᑕᐅᔪᖅ ᐊᐅᓚᑕᐅᔪᖅ ᐱᒪᒃᔅᓕᕐᕕᒃ ᑯᐊᐳᕇᓴᒃᑯᓐᓄᑦ.
“ᐱᓕᕆᕕᑦᑎᓐᓂ ᓯᕗᓪᓕᖅᐹᒥ ᖃᐅᔨᓴᓚᐅᖅᑎᓪᓗᒋᑦ ᐃᓱᒫᓗᓐᓇᖅᑐᓂᒃ ᖃᓄᐃᓕᔪᖃᖅᑐᒥᓂᐅᑎᓪᓗᒍ, ᐋᓐᓂᐊᕐᕕᓕᐊᓚᕿᓚᐅᖅᑎᓪᓗᒋᑦ ᐱᖓᓱᑦ ᐃᑉᐱᒋᔭᐅᒋᐊᓖᑦ ᐅᓂᑦᓯᒪᔪᑦ ᑭᖑᓂᐊᒍᓪᓗ ᐃᓅᒍᓐᓃᓚᐅᖅᑎᓪᓗᒋᒃ ᐋᓐᓂᐊᕐᕕᐊᓗᒻᒥᒃ ᒪᕐᕉᒃ ᑖᒃᑯᓇᖓᑦ ᐅᓂᑦᓯᒪᓚᐅᖅᑐᓄᑦ, ᐱᓕᕆᕕᑦᑎᓐᓂ ᖃᐅᔨᒃᑲᐃᓚᐅᖅᑐᑦ ᓱᕈᓯᕐᓄᑦ ᒪᒃᑯᑦᑐᓄᓪᓗ ᑭᒡᒐᑐᖅᑎᒥᒃ, ᐊᒻᒪᓗ ᓯᓚᑖᓐᓂᒃ ᑎᒥᐅᔪᒥᒃ ᖃᐅᔨᓴᖅᑎᑦᓯᒋᐊᒃᑲᓐᓂᓕᓚᐅᖅᑐᑦ ᖃᓄᖅ ᐃᑉᐱᒋᔭᖃᖃᑦᑕᕐᒪᖓᑕ ᐊᖏᕐᕋᕆᔭᐅᑎᑕᐅᔪᒥ. ᐸᓖᓯᒃᑯᑦ ᖃᐅᔨᓴᖃᑕᐅᒻᒥᔪᑦ.
“ᐃᓚᖏᑦ ᖃᐅᔨᒃᑲᖅᑕᐅᓯᒪᓕᖅᑐᑦ ᖃᓄᐃᓕᔪᖃᓚᐅᖅᑎᓪᓗᒍ, ᐃᑲᔪᖅᓱᖅᑕᐅᔪᑦ ᐃᓄᓕᕆᔨᒃᑯᓐᓄᑦ. ᐃᓄᓕᕆᔨᒃᑯᑦ ᖃᐅᔨᓴᖅᐸᓪᓕᐊᖏᓐᓇᖅᑐᑦ ᐊᓯᖏᓐᓄᑦ ᓄᑦᑎᖅᑕᐅᕕᑦᓴᖏᓐᓄᑦ ᐃᑉᐱᒋᔭᐅᒋᐊᓖᑦ ᒫᓐᓇᐅᔪᖅ ᓱᓕ ᑕᐃᑲᓃᒻᒪᑕ. ᑖᒃᑯᐊ ᐃᑉᐱᒋᔭᐅᒋᐊᓖᑦ ᓱᓕ ᐃᒡᓗᓕᒑᕐᔪᒻᒦᑦᑐᑦ, ᐅᓗᕆᐊᓇᖅᑐᒦᖏᑦᑐᑦ ᐃᑲᔪᖅᑕᐅᒋᐊᓪᓚᑦᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ.
“ᖁᓅᒻᒥᖅᓯᒪᓪᓚᕆᑦᑐᖓ ᐃᓅᒍᓐᓃᖅᑐᒥᓂᐅᓂᖏᓐᓄᑦ ᐊᖏᕐᕋᕆᔭᐅᑎᑕᐅᔪᒥ ᐃᑉᐱᒋᔭᐅᔪᓂᒃ. ᕿᓚᒥᐅᔪᒃᑯᑦ ᖃᓄᐃᓕᒋᐊᑦᓴᐅᑎᒋᓚᐅᖅᑐᒍᑦ ᑲᒪᒋᒋᐊᖅᑐᒍ ᐃᑉᐱᒋᔭᐅᓂᖏᑦ ᐊᖏᕐᕋᕆᔭᐅᑎᑕᐅᔪᒥ ᐱᒋᐊᖅᑎᑦᓯᓪᓗᑕᓗ ᑎᒥᐅᔪᑦ ᐃᓗᐊᓂ ᖃᐅᔨᓴᖅᑕᐅᑎᑦᓯᓂᕐᒥᒃ, ᑭᖑᓂᐊᒍᑦ ᐊᓯᖏᓐᓄᑦ ᑎᒥᐅᔪᓄᑦ ᕿᒥᕐᕈᔭᐅᓂᐊᖅᑐᖅ ᐃᓚᐃᓐᓈᖅᓯᒪᖏᑦᑐᒃᑯᑦ ᐊᑕᖏᖅᑐᒥᓪᓗ ᕿᒥᕐᕈᔭᐅᖁᓪᓗᒍ ᐊᐅᓚᑕᐅᓂᖓ ᐊᖏᕐᕋᕆᔭᐅᑎᑕᐅᔪᒥ. ᐊᖏᔪᖅᑲᐅᑏᑦ ᖃᐅᔨᒃᑲᐃᓯᒪᒻᒥᔪᑦ ᐸᓖᓯᒃᑯᓐᓂᒃ.
“ᖃᐅᔨᓴᖅᑏᑦ ᕿᒥᕐᕈᑦᓯᐊᕐᓂᐊᖅᑐᑦ ᐃᑉᐱᒋᔭᖃᖃᑦᑕᕐᓂᖏᓐᓂᒃ ᐃᓂᖃᖅᑎᑕᐅᔪᓂᒃ ᐊᖏᕐᕋᕆᔭᐅᑎᑕᐅᔪᒥ, ᐱᓗᐊᖑᐊᖅᑐᓂᒃ ᓇᓗᓇᐃᔭᐃᓗᑎᒃ ᐃᓱᒫᓘᑎᐅᔪᓂᒃ. ᑕᒪᓐᓇ ᓇᓗᓇᐃᖅᓯᓯᒪᒍᑕᐅᓂᐊᖅᑐᖅ ᐊᑕᖏᖅᑐᓂᒃ ᐃᓗᓕᖏᓐᓂᒃ ᖃᐅᔨᓴᕈᓐᓇᖁᓪᓗᒋᑦ ᐱᓕᕆᔾᔪᓯᖏᓐᓂᒃ ᒪᓕᑦᑕᐅᒋᐊᓕᓐᓂᓪᓗ ᐊᑐᐊᒐᕐᓂᒃ ᓇᓗᓇᐃᖅᑕᐅᓯᒪᑦᓯᐊᖁᓪᓗᒍ ᖃᓄᐃᑦᑕᐃᓕᑎᑕᐅᒋᐊᖃᕐᓂᖏᑦ ᐊᖏᕐᕋᕆᔭᐅᑎᑕᐅᔪᒦᑦᑐᑦ.
“ᐱᓕᕆᕕᑦᑎᓐᓂ ᓯᕗᓪᓕᖅᐸᐅᑎᓯᒪᐃᓐᓇᖅᑕᕗᑦ ᖃᓄᐃᑦᑕᐃᓕᑎᑕᐅᓂᖏᑦ ᐊᑦᑕᓇᖅᑐᒦᑦᑕᐃᓕᑎᑕᐅᓂᖏᓪᓗ ᐃᑉᐱᒋᔭᐅᒋᐊᓖᑦ. ᑕᒪᓐᓇ ᖃᐅᔨᓴᖅᑕᐅᕙᓪᓕᐊᓂᖓᓄᑦ, ᐱᓕᕆᕕᑦᑎᓐᓂ ᒫᓐᓇᐅᔪᖅ ᐅᖃᐅᓯᑦᓴᖃᕐᕕᖃᔾᔮᖏᑲᐃᓐᓇᖅᑐᑦ.”