ᖁᐃᒃᓱᑰᔨᑲᑕᒃᑐᑦ ᐊᐃᑦᑐᕐᓗᐃᖃᑦᑕᐅᑎᔪᑦ ᑭᕙᓪᓕᕐᒥ
ᑭᖑᓪᓕᖅᐹᒥᒃ ᓄᑖᙳᕆᐊᖅᑎᑕᐅᓚᐅᖅᑐᖅ ᐅᓪᓗᑐᐃᓐᓇᖅ, ᒫᔾᔨ 8, 2024
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᒻᒥᐅᓂᑦ ᐅᔾᔨᖅᓱᖁᔨᕗᑦ, ᐱᓗᐊᖅᑐᒥᑦ ᓄᑕᕋᓛᖃᖅᑐᓂᑦ ᕿᑐᕐᙵᖃᖅᑐᓂᓪᓗ ᓄᑕᖅᑲᓂᒃ, ᖁᐃᖅᓱᑰᔨᑲᑕᒃᑐᑦ ᐊᐃᑦᑐᕐᓗᐃᑲᑕᖕᓂᖏᓐᓂᒃ ᑭᕙᓪᓕᕐᒥ, ᐊᕐᕕᐊᓂ ᑲᖏᖅᖠᓂᕐᒥᓗ ᓇᓗᓇᐃᖅᑕᐅᓯᒪᔪᖃᖅᖢᓂ. ᑭᓇᑐᐃᓐᓇᖅ ᖁᐃᖅᓱᑰᔨᓐᓇᖅᑐᒥᒃ ᓄᕙᓕᕈᓐᓇᖅᐳᖅ, ᑭᓯᐊᓂ ᓄᕙᓕᕐᓂᖅᐹᖑᖃᑦᑕᖅᑐᑦ ᓄᑕᕋᓛᑦ ᓱᓕ ᐅᑭᐅᖅᑖᖅᓯᒪᙱᑦᑐᑦ. ᓄᓇᓖᑦ ᑭᕙᓪᓕᕐᒥ ᐅᔾᔨᕈᓱᐃᓐᓇᖁᔭᐅᕗᑦ ᖃᐅᔨᔭᐅᓵᓕᒃᐸᑕ ᐊᒻᒪ ᐃᖢᐊᖅᓴᖅᑕᐅᓗᑎᒃ ᐱᒻᒪᕆᐅᖕᒪᑦ.
ᖁᐃᖅᓱᑰᔨᓐᓇᖅᑐᖅ ᖃᓂᒪᓐᓇᐅᕗᖅ ᐃᒡᒋᐊᒃᑯᑦ ᐳᕙᒃᑯᓪᓗ ᐊᐃᑦᑐᕐᓘᑕᐅᓴᕋᐃᖦᖢᓂ ᐃᓄᖕᒧᑦ. ᐋᓐᓂᐊᕈᕕᑦ ᕿᑐᕐᖓᐃᓪᓘᓐᓃᑦ ᐋᓐᓂᐊᕈᓂ, ᐊᖏᕐᕋᖅᓯᒪᑐᐃᓐᓇᕐᓗᓯ ᐊᒻᒪ ᐃᓄᖕᓄᐊᑲᑕᙱᓪᓗᓯ ᑭᓯᐊᓂ ᐋᓐᓂᐊᑲᑕᒍᓐᓃᕈᕕᑦ. ᑕᐃᒫᒃ ᖃᓂᒪᓐᓇᒥᒃ ᐊᐃᑦᑐᕐᓗᐃᖏᓐᓂᖅᓴᐅᓂᐊᖅᐳᑦ.
ᐋᓐᓂᐊᕐᕕᖕᒧᑦ ᐅᖃᓗᖕᓂᐊᖅᐳᑎᑦ ᑭᓇᑐᐃᓐᓇᖅ ᐃᒡᓗᒥᐅᖃᑏᑦ ᐅᑯᓂᖓ ᐋᓐᓂᐊᑲᑕᓕᖅᐸᑦ:
- ᖁᐃᖅᓱᖃᑦᑕᒡᓗᓂ ᐱᓇᓱᐊᕈᓯᐅᑉ ᐅᖓᑖᓂ.
- ᖁᐃᖅᓱᓚᐅᕐᓗᓂ ᓂᐱᒋᒐᔪᙱᑕᒥᓂᒃ ᓂᓪᓕᖅᑐᖃᓕᖅᐸᒡᓗᓂ ᓲᓪᓗ "ᖁᐃᖅᓱᑰᔨᓗᓂ".
- ᐊᓂᕐᓂᑭᓪᓗᓂ.
- ᖁᐃᖅᓱᐊᓂᒃᑳᖓᑦ ᒥᕆᐊᖅᓴᓕᖅᐸᒡᓗᓂ.
- ᐅᓐᓄᐊᒃᑯᑦ ᖁᐃᖅᓱᕐᓂᖅᓴᐅᖃᑦᑕᕐᓗᓂ.
- ᐆᓇᕐᓂᖓ (39°C ᐅᖓᑖᓄᓪᓗ) ᑎᑭᐅᑎᑲᑕᒡᓗᓂ ᐅᓪᓗᑦ ᐱᖓᓱᑦ ᐅᖓᑖᓄᑦ.
ᖁᐃᖅᓱᑰᔨᓐᓇᖅᑐᖅᑖᖅᑕᐃᓕᔪᓐᓇᖅᐳᑎᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓗᑎᑦ. ᐃᓄᐃᑦ ᖃᐅᔨᒋᐊᕆᐊᖃᖅᐳᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᔾᔪᑎᖏ ᐊᙳᒻᒪᑎᒐᓗᐊᕐᒪᖔᑕ. ᐅᑯᐊ ᐅᔾᔨᖅᓱᕈᑎᑦ:
- ᐊᒡᒐᑎᑦ ᐅᐊᓴᕋᔪᒡᓗᒋᑦ.
- ᐊᐃᕐᓄᑦ ᒪᑐᐊᕐᓗᑎᑦ ᖁᐃᖅᓱᖅᐸᒡᓗᑎ ᐅᕝᕙᓘᓐᓃᑦ ᑲᒃᑭᐅᑎᒃᓴᒧᑦ.
- ᓂᕆᔭᑎᑦ, ᓂᐅᖅᑲᖅᑕᑎᑦ ᐊᒥᖅᑳᖅᐸᙱᓪᓗᒋᑦ, ᓂᕆᔾᔪᑎᑎᑦ ᐅᕙᓘᓐᓃᑦ ᑭᒍᑎᓯᐅᑎᑎᑦ.
ᖁᐃᖅᓱᑰᔨᓐᓇᖅᑑᑉ ᒥᒃᓵᓄᑦ ᖃᐅᔨᒋᐊᒃᑲᓐᓂᕈᒪᒍᕕᑦ ᐅᑯᐊ ᐅᖃᓕᒫᕈᓐᓇᖅᑕᑎᑦ ᐅᕙᓂ ᖁᐃᖅᓱᑰᔨᓐᓇᖅᑑᑉ ᖃᓄᐃᑦᑑᓂᖓ ᐊᑐᐃᓐᓇᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑭᐊᖅᑭᕕᖓᓂ.