ᐊᐃᑉᐸᖓᓂ ᑲᑎᒪᔨᑖᕈᒪᔪᑦ − ᓄᓇᕗᒻᒥ ᐃᓱᒪᓕᕆᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᕿᓂᕐᒪᑕ ᐃᓄᓐᓂᒃ ᐱᔨᑦᓯᕋᖅᑎᐅᖃᑕᐅᔪᒪᔪᓂᒃ ᓄᑖᕐᒧᑦ ᐃᓱᒪᓕᕆᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ (MHRB). ᐃᓱᒪᓕᕆᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᐱᙳᖅᑎᑕᐅᓯᒪᓕᖅᑐᑦ ᓄᑖᕐᒧᑦ ᐃᓱᒪᓕᕆᓂᕐᒧᑦ ᐱᖁᔭᕐᒧᑦ.

ᓄᑖᖅ ᒪᓕᒐᓕᐊᖑᔪᒪᔪᖅ ᐱᐅᓯᒋᐊᖅᑎᑦᓯᔪᒪᒻᒪᑕ ᐃᓱᒪᒥᒍᑦ ᖃᓄᐃᙱᑦᓯᐊᕐᓂᕐᒧᑦ ᓄᓇᕗᒻᒥᐅᑦ ᐅᖃᐅᓯᖃᕐᓂᕐᒧᓪᓗ ᐃᓄᓐᓅᖓᔪᓂᒃ ᐃᓱᒪᒥᒍᑦ ᖃᓄᐃᙱᑦᑕᕆᐊᖃᕈᑎᖏᑦ, ᑐᕌᒐᖃᕐᓂᕐᓗ ᐃᓚᐃᓐᓇᖓᓂᒃ ᐊᒥᓲᓂᖏᑎᒍᑦ ᐱᕐᔪᐊᖅᑐᓂᒃ ᐃᓱᒪᒥᒍᑦ ᐋᓐᓂᐊᖅᑐᓂᒃ ᐃᓗᐊᖅᓴᖅᑕᐅᔭᕆᐊᓕᓐᓄᑦ.

ᐃᓱᒪᓕᕆᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᐅᑯᓂᖓ ᐃᓚᖃᕐᓂᐊᖅᑐᑦ:

• ᐊᑕᐅᓯᖅ ᑲᑎᒪᑎᑦᓯᔨ (ᒪᓕᒐᓕᕆᔨ ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓘᓐᓃᑦ ᐱᓕᕆᔨᐅᓗᓂ).
• ᐅᓄᕐᓂᕆᒐᔪᑦᑕᖏᑦ ᐱᖓᓱᓂᒃ ᒪᓕᒐᓕᕆᔨᖃᕐᓗᑎᒃ.
• ᐅᓄᕐᓂᕆᒐᔪᑦᑕᖏᑦ ᐱᖓᓲᔪᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᐅᔪᓂ (ᐃᓱᒪᓕᕆᔩᑦ, ᓘᒃᑖᑦ, ᐋᓐᓂᐊᓯᐅᖅᑎᙳᕆᐅᖅᓴᔪᑦ, ᓇᓗᓇᐃᒃᑯᑕᓖᓪᓗ ᐃᓱᒪᓕᕆᓂᕐᒧᑦ ᐋᓐᓂᐊᓯᐅᑏᑦ), ᐃᓚᖃᕐᓗᓂ ᐅᓄᕐᓂᕆᒐᔪᑦᑕᖏᑦ ᐱᖓᓱᓂᒃ ᐃᓱᒪᓕᕆᔨᓂᒃ.
• ᐅᓄᕐᓂᕆᒐᔪᑦᑕᖏᑦ ᐱᖓᓱᓂᒃ ᓄᓇᓕᓐᓂᙶᖅᑐᓂᒃ ᑲᑎᒪᔨᓂ.
• ᐅᓄᕐᓂᕆᒐᔪᑦᑕᖏᑦ ᐱᖓᓱᓂᒃ ᐃᓄᐃᑦ ᐃᓕᖅᑯᓯᖏᓐᓄᑦ ᐅᖃᐅᔾᔨᒋᐊᖅᑎᓂᒃ.

ᓂᕈᐊᖅᑕᐅᔪᑦ ᐱᔭᑦᓴᖅᑖᖅᑎᑕᐅᓂᐊᖅᑐᑦ ᐃᓕᓐᓂᐊᖅᑎᑕᐅᓗᑎᓪᓗ ᓄᑖᖅ ᐃᓱᒪᓕᕆᓂᕐᒧᑦ ᐱᖁᔭᖅ ᐊᑐᓕᓚᐅᖅᑎᓪᓗᒍ.

ᑖᒃᑯᐊ ᐃᓱᒪᓕᕆᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᐱᔪᓐᓇᐅᑎᖃᕐᓂᐊᖅᐳᑦ ᓴᖅᑭᑎᑦᓯᓂᕐᒧᑦ ᕿᒥᕐᕈᔨᓂᒃ ᑲᒪᒋᔭᖃᕐᓂᕐᒧᑦ ᓈᓚᓐᓂᐅᔪᓂᒃ ᐊᔾᔨᒌᙱᑦᑐᓄᑦ ᐱᔾᔪᑕᐅᔪᓄᑦ. ᐃᓱᒫᓘᑎᑕᖃᑦᓴᐅᑎᒋᑉᐸᑦ ᑕᐃᒃᑯᓄᖓ ᖃᐅᔨᕈᓘᔭᖅᑐᓄᑦ ᐃᓱᒪᓕᕆᓂᕐᒧᑦ ᐊᑦᓱᕈᕐᓇᖅᑐᒃᑰᖅᑐᑦ ᐃᓅᓕᓴᐅᑎᑐᖅᑎᑕᓄᑦ, ᐃᓄᐃᑦ ᐱᓯᒪᔭᐅᖏᓐᓇᑐᐃᓐᓇᕆᐊᖃᖃᑦᑕᕐᓂᐊᖅᑐᑦ ᖃᐅᔨᒪᔭᐅᓇᓱᓪᓗᑎᒃ ᖃᓄᐃᙱᑦᓯᐊᕋᓗᐊᕐᒪᖔᑕ ᐊᑦᑕᕐᓇᖅᑐᒦᙱᒃᑲᓗᐊᕐᒪᖔᑕᓗ. ᓄᑖᖅ ᒪᓕᒐᓕᐊᖑᔪᒪᔪᖅ ᒪᓕᓪᓗᒍ, ᐃᓄᐃᑦ ᐱᓯᒪᔭᐅᔪᑦ, ᑕᐃᒃᑯᐊ ᑭᒡᒐᖅᑐᐃᔪᑦ, ᐊᓯᖏᓪᓗ ᖁᑦᓯᓂᖅᓴᒧᑦ ᐅᓐᓂᕐᓗᒍᓐᓇᖅᑐᑦ ᐃᓱᒪᓕᐅᕈᑕᐅᔪᓂᒃ ᐃᓱᒪᓕᕆᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.

ᑕᑯᓗᒍ ᐱᓇᓱᐊᕈᑎ ᑕᑕᑎᕆᐊᓕᒃ ᐊᔪᙱᑎᑕᐅᓇᔭᖅᑐᑦ ᑲᑎᒪᑎᑦᔨᒧᑦ, ᒪᓕᒐᓕᕆᔨ, ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᐱᓕᕆᔨᐅᔪᑦ ᐃᖅᑲᓇᐃᔮᓕᓐᓄᑦ. ᖃᐅᔨᒪᓗᓂ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ, ᐃᓄᐃᑦ ᐅᖃᐅᓯᖏᓐᓂᒃ, ᐊᒻᒪ ᓄᓇᕗᒻᒥ ᐃᑲᔫᑎᖃᑦᓯᐊᕋᔭᕐᒥᔪᖅ. ᐱᔭᕆᐊᖃᖅᐸᑦ, ᓂᕈᐊᕆᔭᐅᓂᖅᓴᐅᓂᐊᖅᑐᑦ ᐃᓄᐃᑦ ᐊᒻᒪ ᓄᓇᕗᒻᒥᐅᑦ.

ᑕᐃᒃᑯᐊ ᐱᔪᒪᓂᖃᖅᑐᑦ ᑲᑎᒪᑎᑦᓯᔨᒧᑦ, ᒪᓕᒐᓕᕆᔨᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᐱᓕᕆᔨᐅᔪᑦ ᐃᖅᑲᓇᐃᔮᓖᑦ, ᐃᖅᑲᓇᐃᔮᕆᓯᒪᔭᑎᑦ ᑎᑎᕋᖅᓯᒪᔪᑦ ᐱᓇᓱᐊᕈᑏᓪᓗ ᑐᓂᓗᒍ ᐃᕐᖐᓐᓈᖅᑕᐅᑎᒃᑯᑦ ᑭᒻ ᐸᕋᑎᔅᒧᑦ ᐅᕗᖓ@email ᓇᒡᒐᔾᔭᐅᙳᓚᐅᖏᓐᓂᖓᓂ, ᐄᐳᓗ 22, 2024, 5:00-ᒥ ᐅᓐᓄᓴᒃᑯᑦ. ᑲᓇᓐᓇᐅᑉ ᓯᕿᕐᖑᔭᖓ. ᑕᐃᒃᑯᐊ ᐱᓇᓱᐊᖅᓯᒪᔪᑦ 2023−ᒥ ᐱᓇᓱᐊᖅᑎᓪᓗᒋᑦ ᐱᓇᓱᐊᑲᓐᓂᕆᐊᑐᙱᑦᑐᑦ. ᓂᕈᐊᖅᑕᐅᔪᑦ ᐱᓇᓱᐊᖅᑐᑦ ᑕᒪᐃᓐᓂᒃ ᓯᕗᓪᓕᕐᒥ ᐊᐃᑉᐸᖓᓂᓗ ᐱᓇᓱᐊᕐᑎᓪᓗᒋᑦ ᖃᐅᔨᒋᐊᕐᕕᐅᔪᓐᓂᐊᖅᑐᑦ ᐊᑕᐅᑦᓯᒃᑯᑦ.

ᒪᓕᓪᓗᒍ ᐃᓚᒍᑖ 64 ᓄᑖᕐᒥ ᐃᓱᒪᓕᕆᓂᕐᒧᑦ ᐱᖁᔭᕐᒥ, ᓄᓇᕗᑦ ᑐᙵᕕᒃᑯᑦ ᑲᒪᒋᔭᒃᓴᖃᖅᐳᑦ ᓂᕈᐊᕋᑦᓴᙳᑎᑦᓯᓂᕐᒥᒃ ᓄᓇᓕᓐᓂᒥᐅᓂᒃ ᐃᓄᐃᓪᓗ ᐃᓕᖅᑯᓯᑐᖃᖏᓐᓄᑦ ᐅᖃᐅᔾᔪᐃᔨᓂᒃ. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᓗᒍ ᐆᐸᓪ ᒪᑭᓂᔅ ᐅᕙᓂ @email ᐅᕝᕙᓘᓐᓃᑦ 867-975-7577.