ᐃᓄᓕᕆᔨᒃᑯᑦ ᐊᑦᑎᖅᑕᐅᔪᒪᒐᓗᐊᕐᒪᑕ ᓄᑖᕐᒧᑦ ᐃᓚᒌᓄᑦ ᖃᓄᐃᙱᑦᑎᐊᖅᑐᒃᑯᕕᖕᒧᑦ

ᒫᔾᔨ 13, 2024−ᒥ, ᒪᓕᒐᓕᐅᖅᑎ ᒫᒡᒍᓚ ᓇᑲᓱᒃ, ᒥᓂᔅᑕ ᐃᓄᓕᕆᔨᒃᑯᓐᓄᑦ ᑐᓴᖅᑎᑦᑎᓚᐅᖅᐳᖅ ᐅᒃᑯᐃᖅᑕᐅᒃᑲᓐᓂᕐᓂᐊᓕᕐᓂᖓᓂ ᐃᒡᓗᕐᔪᐊᖅ 439 ᐃᖃᓗᖕᓂ, ᒫᓐᓇ ᑕᐃᔭᐅᓲᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᕝᕕᒃ. ᐊᖏᖅᓯᒪᓂᖅᐳᑦ ᑕᑯᒃᓴᐅᑎᑦᑐᒪᓪᓗᒍ ᓄᓇᓕᖕᓄᑦ, ᐃᓄᓕᕆᔨᒃᑯᑦ ᓄᓇᕗᒻᒥᐅᓂᒃ ᑎᓕᐅᕆᕗᑦ ᐊᑎᖅᑕᐅᔪᒪᓪᓗᑎᒃ ᐅᖃᐅᓯᖃᖁᓪᓗᒋᑦ ᓄᑖᙳᕆᐊᖅᓯᒪᔪᒧᑦ ᐃᓂᒧᑦ.

ᐊᕐᓇᓄᑦ ᐊᖏᕐᕋᕆᔭᐅᕙᓚᐅᖅᑐᖅ, ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᕝᕕᒃ ᐃᒡᓗᕈᓯᖃᑦᑎᐊᖅᑐᖅ, ᐱᓕᕆᐊᒃᓴᖃᖅᖢᓂ, ᐊᒻᒪ ᐊᒡᓚᕝᕕᖕᓂᑦ, ᑐᙵᕕᓕᐅᖅᑐᓂ ᐃᓚᒌᓄᑦ ᐃᑲᔪᖅᑏᑦ ᐃᓚᒌᓂᑦ ᐱᓕᕆᖃᑎᖃᕈᓐᓇᖁᓪᓗᒋᑦ. ᑐᐊᕕᕐᓇᖅᑐᖃᖅᑎᓪᓗᒍ, ᑖᓐᓇ ᐃᒡᓗ ᐊᑦᑕᕐᓇᙱᓪᓗᓂ ᐊᒻᒪ ᐱᕈᕐᓇᑦᑎᐊᕐᓗᓂ ᓄᑕᖅᑲᓄᑦ. ᐊᒻᒪᓗᒃᑲᓐᓂᖅ, ᑖᓐᓇ ᐃᓂᒋᔭᐅᔪᖅ ᐱᓕᕆᕝᕕᐅᖃᑦᑕᕐᓂᐊᕐᒥᔪᖅ ᑲᒪᔨᖃᖅᐸᒡᓗᑎᒃ ᐳᓛᕆᐊᕐᕕᐅᕙᒡᓗᓂ, ᐊᔪᕈᓐᓃᖅᑎᓪᓗᒋᑦ ᐱᒻᒪᕆᐅᔪᑦ ᐳᓛᕆᐊᕐᓂᐅᓲᑦ ᓄᑕᖅᑲᓂᒃ ᑲᒪᒋᔭᐅᔪᓂᒃ ᐊᖓᔪᖅᑳᖏᓪᓗ ᐸᖅᑭᔨᖏᓪᓗ. ᑖᓐᓇ ᓄᑖᖅ ᐃᓂᒋᔭᐅᓂᐊᖅᑐᖅ ᐱᕕᒃᓴᖃᖅᑎᑦᑎᓂᐊᖅᐳᖅ ᐱᓕᕆᐊᒃᓴᒃᑲᓐᓂᕐᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᑲᒪᒋᔭᐅᕙᒡᓗᑎᒃ ᐃᑲᔪᖅᑐᖅᑕᐅᒋᐊᓕᑦ ᓄᑕᖅᑲᑦ ᐃᓚᖏᓪᓗ.

ᖁᕕᐊᓲᑎᒋᔭᐅᑎᓪᓗᒍ ᓄᑖᙳᕆᐊᖅᓯᒪᔪᖅ ᐱᓕᕆᕝᕕᒃ, ᐃᓄᓕᕆᔨᒃᑯᑦ ᐃᓄᒃᑎᑐᑦ ᐊᑦᑎᖅᑕᐅᔪᒪᔫᒐᓗᐊᑦ. ᓄᓇᕗᒻᒥᐅᑦ ᑐᙵᓱᒃᑎᑕᐅᕗᑦ ᑐᓂᓯᖁᔭᐅᓪᓗᑎᒃ ᐃᓄᒃᑎᑐᑦ ᐊᑎᕐᓂᒃ ᐃᒪᓐᓇᐅᖁᔨᓇᔭᖅᑐᓂᒃ:

• ᐅᔾᔨᕆᑦᑎᐊᕐᓗᒋᑦ ᑲᒪᒋᔭᐅᒋᐊᓕᑦ ᐃᓚᒌᓄᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᐊᑕᐅᑦᑎᒃᑰᖃᑎᖃᕐᓗᑎᒡᓗ ᐱᓕᕆᕝᕕᒋᔭᐅᔫᑉ ᑕᐅᑐᖅᑰᖅᑕᖓᓄᑦ.
• ᐃᑲᔪᖅᓱᐃᔪᖅ ᖃᓄᐃᙱᑦᑎᐊᕐᓂᖏᓐᓄᑦ ᐃᓄᐃᑦ ᖃᑕᙳᑎᒌᓪᓗ.
• ᐃᑲᔪᖅᑐᐃᕙᒃᐳᖅ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᑐᕌᖓᑎᑕᐅᔪᓂᒃ ᐱᐅᓯᒋᐊᖅᑎᑦᑎᓂᐊᕐᓗᓂ ᑎᒥᒃᑯᑦ, ᐃᓱᒪᒃᑯᑦ, ᐃᒃᐱᒋᔭᒃᑯᑦ, ᐃᓅᖃᑎᒌᖕᓂᕐᒧᓪᓗ ᖃᓄᐃᙱᑦᑎᐊᕈᓐᓇᕐᓂᕐᒥᒃ.

ᐊᑦᑎᖅᓱᐃᔾᔪᓯᕐᒥᒃ ᐃᓚᐅᑎᑦᑎᓗᑎᒃ ᐃᓐᓇᕐᓂᒃ ᐱᓕᕆᐊᖑᖃᑦᑕᕐᓂᐊᖅᐳᑦ ᐃᓱᒪᒋᔭᐅᔪᑦ ᑐᓐᓂᖅᑯᑕᐅᕌᓂᒃᐸᑕ. ᓵᓚᖃᖅᑐᖅ ᑐᓐᓂᖅᑯᓯᐊᕋᔭᖅᑐᖅ ᓂᐅᕕᕈᓐᓇᐅᑎᒥᒃ $500-ᒥᒃ.

ᐃᓱᒪᒋᔭᑎᑦ [email protected]−ᑯᓐᓄᑦ  ᓇᒃᓯᐅᑎᓂᐊᖅᐸᑎᑦ ᐊᐃᕆᓕ 30, 2024−ᙳᓚᐅᙱᓐᓂᖓᓂ. ᐃᓚᓕᐅᔾᔨᓗᑎᑦ ᐊᑎᕐᒥᒃ ᐃᓱᒪᒋᔭᕐᓂᒃ ᐊᒻᒪᓗᑦᑕᐅᖅ ᓇᐃᑦᑐᒥᑦ ᑐᑭᓯᓇᖅᓯᑎᓪᓗᒍ ᓱᖕᒪᑦ ᑖᓐᓇ ᐊᑦᑎᕋᓱᒃᑕᑦ ᐃᓱᒪᒋᔭᐅᒋᐊᖃᕐᒪᖔᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐱᔨᑦᑎᕋᐅᑎᐅᖃᑦᑕᓚᐅᖅᑐᑦ ᒥᒃᓵᓄᑦ ᐃᓄᓕᕆᔨᒃᑯᓐᓂ, ᐃᓄᓕᕆᔨᒃᑯᑦ ᐃᑭᐊᖅᑭᕕᖓᓐᓄᐊᕈᓐᓇᖅᐳᑎᑦ.