ᐊᐅᓚᑦᑎᔨ ᐊᖏᕐᕋᓕᕆᔨᓄᑦ ᐊᒻᒪ ᓄᓇᓕᖕᓂᑦ ᑲᒪᔨᓄᑦ
ᐅᓇ ᐃᖅᑲᓇᐃᔮᒃᓴᖅ ᑭᒃᑯᑐᐃᓐᓇᓄᑦ ᐱᓇᔪᒍᒪᔪᓄᑦ ᒪᑐᐃᖓᔪᖅ.
ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ, ᐃᖅᑲᓇᐃᔭᕐᕕᑦᑎᐊᕙᐅᓛᖑᓂᖓᓄᑦ ᒪᒃᑯᒃᑐᓄᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓵᓚᐅᖅᑐᓄᑦ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᒃᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᑦ ᐆᒻᒪᕆᒃᑐᖅ, ᐱᔪᒃᓯᑦᑎᐊᖅᑐᑦ, ᐊᖏᖅᓯᒪᑦᑎᐊᖅᖢᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ. ᒐᕙᒪᐅᑎᓪᓗᑕ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓂᕐᒧᑦ ᐃᓄᐃᑦ ᐱᖅᑯᓯᖏᓐᓂᒃ, ᓴᖅᑭᔮᖅᑎᑦᑎᓂᕐᒧᑦ ᐃᓄᒃᑐᑦ ᐅᖃᐅᓯᖓᓐᓂᑦ, ᑭᒡᒐᖅᑐᐃᑦᑎᐊᕐᓂᕐᒧᑦ ᒐᕙᒪᒃᑯᓐᓂᑦ ᐃᖅᑲᓇᐃᔭᖅᑎᓂᒃ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᑲᔪᓯᑎᑦᑎᓂᕐᒧᑦ ᐊᖏᖅᓯᒪᓂᕆᔭᖓᓂᑦ ᓄᓇᕗᒻᒧᑦ. ᐃᖅᑲᓇᐃᔮᖅᑖᖅᑐᖅ ᐊᑭᓕᖅᓱᖅᑕᐅᑦᑎᐊᕐᓂᐊᖅᑐᖅ, ᐋᓐᓂᐊᕐᕕᖕᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᖃᕐᓗᓂ, ᓇᓗᓇᐃᔭᖅᑕᐅᓯᒪᔪᓂᑦ ᐃᓐᓇᖅᓯᐅᑎᒃᓴᓄᑦ ᐃᑲᔫᑎᖃᕐᓗᓂ, ᓅᑕᐅᓂᕐᒧᑦ ᐱᔪᓐᓇᐅᑎᓂᑦ ᐃᓕᓐᓂᐊᕈᓐᓇᖅᑎᑕᐅᓗᓂ ᐃᖅᑲᓇᐃᔮᒥᓪᓗ ᐱᕚᓪᓕᖅᐸᓪᓕᐊᓗᓂ.
ᑐᑭᒧᐊᒃᑎᑦᑎᔨᒧᑦ ᐅᓂᒃᑳᖅᐸᒡᓗᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᐊᖏᓐᓄᑦ, ᐊᐅᓚᑦᑎᔨ ᐊᖏᕐᕋᓕᕆᔨᓄᑦ ᐊᒻᒪ ᓄᓇᓕᖕᓂ ᑲᒪᔨᓄᑦ ᐱᑎᑦᑎᖃᑦᑕᕐᓂᐊᖅᐳᑦ ᐱᓕᕆᐊᒃᓴᒧᑦ ᐊᔪᙱᑦᑎᐊᕐᓂᕐᒥ ᐊᐅᓚᑦᑎᓗᓂᓗ ᐃᑲᔪᖅᓱᕐᓂᕐᒥ ᐸᕐᓇᐃᑎᓪᓗᒋᑦ, ᐱᓕᕆᐊᒃᓴᒧᑦ ᐱᕙᓪᓕᐊᑎᑦᑎᑎᓪᓗᒋᑦ, ᐱᔨᑦᑎᕋᖅᑎᓪᓗᒋᑦ ᖃᐅᔨᓴᖅᑎᓪᓗᒋᓪᓗ ᐊᖏᕐᕋᓕᕆᔨᓄᑦ ᐊᒻᒪ ᓄᓇᓕᖕᓂᑦ ᑲᒪᒋᔭᒃᓴᓄᑦ ᐱᓕᕆᐊᒃᓴᖓᓄᑦ ᓄᓇᓕᖏᓐᓂ. ᑖᓐᓇ ᐃᓚᐅᑎᑦᑎᓇᔭᖅᑐᖅ ᐊᐅᓚᑦᑎᓂᕐᒨᖓᔪᓂᒃ ᐊᔪᙱᑦᑎᐊᕐᓗᓂ ᐃᖅᑲᓇᐃᔭᕐᕕᖕᒥ, ᐱᓕᕆᖃᑎᖏᑕ ᐃᖅᑲᓇᐃᔭᕐᕕᖏᓐᓂ ᐊᕕᒃᑐᖅᓯᒪᔪᓂᒃᓗ ᑐᑦᑕᕐᕕᖕᓂ, ᐱᔪᒪᑎᑦᑎᓗᓂᓗ ᓄᓇᓕᖕᒥ ᐱᕙᓪᓕᐊᑎᑦᑎᓂᕐᒥ ᐊᑐᓕᖅᑎᑦᑎᒃᑲᓐᓂᕐᓗᓂᓗ ᓄᓇᓕᖕᓂ ᐱᔪᓐᓴᕐᓂᕆᔭᐅᔪᓂᒃ.
ᐊᐅᓚᑦᑎᔨ ᐊᖏᕐᕋᓕᕆᖦᓄᑦ ᐊᒻᒪ ᓄᓇᓕᖕᓂ ᑲᒪᔨᓄᑦ ᓇᓗᓇᙱᑎᑦᑎᖃᑦᑕᕐᓂᐊᖅᐳᖅ ᐋᖅᑭᑦᑎᐊᖅᓯᒪᔪᓂᒃ ᐊᑑᑎᖃᑦᑎᐊᖅᑐᓂᒡᓗ ᐊᐅᓚᑕᐅᒋᐊᓕᖕᓂᒃ ᐃᑲᔪᖅᓱᐃᔾᔪᑎᓪᓗ ᐊᖏᕐᕋᓕᕆᔨᓂᒃ ᓄᓇᓕᖕᒥᓗ ᑲᒪᒋᔭᒃᓴᓄᑦ ᐱᓕᕆᐊᒃᓴᓂᑦ ᒪᓕᒃᓗᑎᒃ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᒪᓕᒐᖏᓐᓂ ᑲᒪᒋᔭᒃᓴᓄᑦ. ᐊᖏᕐᕋᓕᕆᔨᓄᑦ ᐊᒻᒪ ᓄᓇᓕᖕᓂ ᑲᒪᒋᔭᐅᔪᓕᕆᔨᑦ ᓇᓗᓇᖅᑎᑦᑎᕙᙱᓚᖅ ᐱᓕᕆᔾᔪᓯᕐᓂᒃ, ᐃᓗᐊᖅᓴᐃᓂᕐᒥ, ᐃᑲᔪᖅᓱᐃᓂᕐᒥᒡᓗ ᐱᔨᑦᑎᕋᐅᑎᓂᒃ ᑲᒪᒋᔭᖏᓐᓄᑦ ᐊᖏᕐᕋᖏᓐᓂ ᐊᓯᖏᓐᓂᒡᓗ ᓄᓇᓕᖕᒥ ᐋᖅᑭᒃᓯᒪᓂᖏᓐᓂ, ᐃᑲᔪᕐᓗᒋᑦ ᐊᐅᓚᑦᑎᐊᕈᓐᓇᖁᓪᓗᒋᑦ ᐊᔪᙱᓐᓂᖏᑕ ᓇᓃᓐᓂᖏᑎᒍᑦ ᐃᖕᒥᓂᒡᓗ ᐱᔪᓐᓇᐃᓐᓇᖅᑎᒋᐊᕐᓗᒋᑦ ᐃᖅᑲᓇᐃᔭᕐᕕᖕᒨᖓᔪᒧᑦ ᑲᒪᒋᔭᐅᓂᕐᒧᑦ ᐱᔨᑦᑎᕋᐅᑎᓂᒃ.
ᖃᐅᔨᒪᔭᕆᐊᓕᖏᑦ, ᐊᔪᙱᑦᑕᕆᐊᓕᖏᑦ, ᐊᒻᒪ ᐱᔪᓐᓇᕐᓂᖃᑦᑎᐊᕆᐊᓕᒃ ᑖᔅᓱᒥᖓ ᐃᖅᑲᓇᐃᔮᖃᕐᓗᓂ ᐊᔪᕈᓐᓃᖅᑕᐅᒐᔪᒃᐳᑦ ᐱᔭᕇᕈᓯᐊᖅᑖᕐᓗᓂ ᓯᓚᑦᑐᖅᓴᕐᕕᒡᔪᐊᕐᒥ ᐃᓗᐊᖅᓴᐃᔨᐅᓂᕐᒧᑦ ᐃᓚᖃᕐᓗᓂᓗ ᐅᑭᐅᓄᑦ ᑕᓪᓕᒪᓄᑦ ᐋᓐᓂᐊᕕᖕᒥ ᐃᓗᐊᖅᓴᐃᔨᐅᓂᑰᓗᓂ ᐊᒻᒪ ᐅᑭᐅᓄᑦ ᐱᖓᓱᓄᑦ ᐊᖓᔪᖅᑳᖑᖃᑦᑕᕐᓂᑰᓗᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ. ᐃᖅᑲᓇᐃᔮᖅᑖᕋᓱᐊᖅᑐᑦ ᐱᔪᓐᓇᕆᐊᖃᖅᑐᑦ ᐊᑎᓕᐅᖃᑕᐅᓂᕐᒧᑦ ᐃᓗᐊᖅᓴᐃᔨᑦ ᑲᑐᔾᔨᖃᑎᒌᓄᑦ ᓄᓇᑦᓯᐊᕐᒥ ᓄᓇᕗᒻᒥᓗ. ᒪᓕᒃᑕᐅᒐᔪᒃᑐᑦ BCLS ᐃᓕᑕᕆᔭᐅᔾᔪᑎᓄᑦ ᐊᕐᕌᒍᑕᒫᑦ ᐃᓕᑕᕆᔭᐅᔾᔪᑎᑖᒃᑲᓐᓂᖅᐸᒡᓗᓂ ᐱᔭᐅᔪᒪᓇᔭᖅᑐᖅ; ᐋᓐᓂᖅᓯᒪᔪᒧᑦ ᑲᒪᔪᓐᓇᕐᓂᖅ, ᑎᒥᒃᑯᑦ ᓱᑲᖃᓗᐊᖅᑐᓄᑦ ᓂᕆᔾᔪᓯᕐᓄᑦ ᑲᒪᓂᖅ, ᐃᓅᓕᓴᐅᑎᓕᕆᓂᕐᒥ ᑲᒪᓂᖅ, ᐊᔾᔨᐅᙱᑦᑐᒧᑦ ᐃᓯᒐᖕᓄᑦ ᑲᒪᓂᖅ, ᑎᒥᖓᑕ ᓯᓚᑖᓃᑦᑐᒥᒃ ᑲᐱᖃᑦᑕᕐᓂᖅ (PIV) ᕿᑎᐊᓃᑦᑐᒥᒡᓗ ᐃᒻᒥᖅᓱᖅᑕᐅᖃᑦᑕᕐᓂᖅ (IV) ᐱᔪᓐᓇᕐᓂᕐᒧᑦ ᐃᓕᑕᕆᔭᐅᔾᔪᑎᑦ ᐱᔭᕆᐊᖃᖅᑐᐃᓐᓇᑦ.
ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ.
ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᔭᕆᐊᓕᒃ ᐃᖅᑲᓇᐃᔮᖅᑖᕋᓱᒃᑐᖅ. ᑐᓐᓂᖅᑯᑎᒋᓗᒍ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᒧᑦ ᓇᓗᓇᐃᒃᑯᑕᐃᑦ ᐃᖅᑲᓇᐃᔮᖅᑖᕋᓱᒍᑎᒋᔭᕐᓄᑦ.
ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑐᑦ, ᖃᓪᓗᓈᑐᑦ ᐅᐃᕖᑐᓪᓗ. ᐱᓇᔪᒃᑐᑦ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑎᑎᕋᕈᓐᓇᖅᑐᖅ ᓂᕈᐊᕆᔭᒥᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ. ᐅᖃᕈᓐᓇᖅᐸᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐅᖃᐅᓯᕐᓂᑦ ᐃᑲᔫᑎᖃᑦᑎᐊᕋᔭᖅᑐᖅ. ᐃᓄᐃᑦ ᓄᓇᓕᖏᓐᓂ, ᐃᓕᖅᑯᓯᖏᓐᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᐃᓄᒃᑐᑦ ᖃᐅᔨᒪᒍᓂ ᐱᓕᕆᖃᑦᑕᖅᓯᒪᓗᓂᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.
ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑎᓕᐅᕆᒃᑲᓐᓂᖅᑐᒍᑦ ᐱᓇᔪᖁᔨᓪᓗᑕ ᐃᓕᖕᓂᑦ ᑕᐃᒪᓐᓇᓪᓗᐊᖅ ᐅᑭᐅᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᒍᕕᑦ ᐃᓕᓐᓂᐊᖅᓯᒪᔭᕆᐊᓕᑦ ᐱᓕᕆᖃᑦᑕᖅᓯᒪᔭᕆᐊᓕᒡᓗ ᐊᔾᔨᖓᓂ ᖁᓛᓂᑦ ᑎᑎᕋᖅᓯᒪᔪᓂᑦ.
ᐃᖅᑲᓇᐃᔭᐃᓐᓇᖅᑐᓄᑦ, ᐊᑕᐃᓐᓇᕐᓂᐊᖅᑐᓄᑦ ᐃᓗᐊᖅᓴᐃᔨᓄᑦ, ᐃᖅᑲᓇᐃᔮᖃᐃᓐᓇᖅᑐᑦ ᐊᑭᓕᖅᑕᐅᒃᑲᓐᓂᖃᑦᑕᕐᓂᐊᖅᐳᑦ: $5,000 ᐃᖅᑲᓇᐃᔮᒥ ᐱᒋᐊᓕᓵᖅᑎᓪᓗᒋᑦ, $5,000 ᑕᖅᑭᓄᑦ 18−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ ᐊᒻᒪ $10,000 ᑕᖅᑭᓄᑦ 30−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ. ᐃᓚᓕᐅᔾᔭᐅᓯᒪᔪᑦ ᐊᑭᓕᐅᑎᑦ ᐃᓚᖃᖅᑐᑦ $4,500−ᓂᑦ ᑕᖅᑭᑕᒫᑦ ᐸᐸᑦᑎᓂᕐᒧᑦ $4,500 ᐊᕐᕌᒍᓕᒫᒧᑦ.
ᐊᔪᙱᑎᑕᐅᔪᓐᓇᕐᓂᕐᒧᑦ ᓇᓗᓇᐃᖅᓯᒪᔪᑦ ᓴᖅᑭᑕᐅᑐᐃᓐᓇᕆᐊᓖᑦ ᐃᓐᓄᒃᓯᒪᙱᑦᑐᑦ ᓯᕗᓂᒃᓴᒥ ᐃᓐᓄᒍᓐᓇᖁᓪᓗᒋᑦ.
ᐱᓇᔪᒍᒪᒍᕕᑦ ᐃᖅᑲᓇᐃᔮᒃᓴᒧᑦ, ᓇᒃᓯᐅᑎᓗᒍ ᐃᕐᖐᓐᓈᖅᑕᐅᒃᑯᑦ ᑎᑎᖅᑲᖃᕐᓗᓂᓗ ᐃᖅᑲᓇᐃᔭᖅᑖᕋᓲᑎᑦ ᐅᕗᖓ @email. ᐃᓚᓕᐅᑎᓯᒪᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᐃᕐᖐᓐᓈᖅᑕᐅᑎᖕᓂ.
- ᓄᓇᕗᑦ ᒐᕙᒪᒃᑯᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᔨᓂᒃ ᐃᖅᑲᓇᐃᔭᖅᑎᓂᒃ; ᑕᐃᒪᐃᒻᒪᑦ, ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᖕᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᖅ ᒪᓕᒡᓗᒍ.
- ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᓕᓵᖅᑐᑦ ᖃᐅᔨᓴᖅᑕᐅᔪᑦ ᐱᔭᕆᐊᖃᖅᑐᑦ ᑐᓂᓯᓗᑎᒡᓗ ᐱᔪᓐᓇᖅᑎᑕᐅᓂᕐᒧᑦ ᑎᑎᖅᑲᒥᒃ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᒥᒃ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ.
- ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓖᑦ ᐊᔪᖅᑎᑕᐅᙱᑐᐃᓐᓇᕆᐊᓕᑦ ᐃᖅᑲᓇᐃᔮᖅᑖᕋᓱᒃᑐᑦ ᐃᓱᒪᒋᔭᐅᓂᐊᖅᑐᓄᑦ. ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐃᖅᑲᓇᐃᔮᒃᓴᒥ ᐱᓕᕆᐊᒃᓴᕆᔭᐅᔪᓂᑦ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒥᑦ ᓈᒻᒪᒋᔭᐅᓗᓂ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ.
- ᐱᓇᔪᒍᒪᔪᑦ ᐃᖅᑲᓇᐃᔮᖅᑖᕋᓱᐊᕈᑎᒥᒃ ᑐᓂᓯᔪᓐᓇᖅᑐᑦ ᓄᓇᕗᒻᒥ ᐃᓕᓴᕆᔭᐅᓯᒪᔪᒥᑦ ᐅᖃᐅᓯᕐᒥᑦ ᓇᓕᐊᖕᓂᑐᐃᓐᓇᖅ ᐊᑐᕐᓗᓂ.
- ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
- ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ. ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᓱᐊᖅᑕᑦ ᐋᒃᑳᖅᑕᐅᑐᐃᓐᓇᕆᐊᓕᒃ.