ᐃᓕᓐᓂᐊᕆᐊᖅᑐᑦ ᐊᐅᓪᓚᖅᐸᒃᑐᑦ ᑮᓇᐅᔭᖏᑕ

ᐃᓕᓐᓂᐊᕆᐊᖅᑐᑦ ᐊᐅᓪᓚᖅᐸᒃᑐᑦ ᑮᓇᐅᔭᖏᑕ ᒪᓕᒐᖏᑦ

ᑭᓲᕙ ᐃᓕᓐᓂᐊᕆᐊᖅᑐᑦ ᐊᐅᓪᓚᖅᐸᒃᑐᑦ ᑮᓇᐅᔭᖏᑦ?

ᐃᓕᓐᓂᐊᕆᐊᖅᑐᑦ ᐊᐅᓪᓚᖅᐸᒃᑐᑦ ᑮᓇᐅᔭᖏᑦ ᑐᕌᒐᖃᖅᐳᑦ ᐅᓄᖅᓯᒋᐊᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᖅᑎᑦ ᐃᖅᑲᓇᐃᔮᒥᓂᒃ ᐱᔾᔪᑎᖃᖅᖢᑎᒃ ᐃᓕᓐᓂᐊᕆᐊᖃᑦᑕᖅᑐᑦ ᐊᒻᒪ ᖃᔅᓰᖅᖢᑎᒃ ᐃᓕᓐᓂᐊᕆᐊᖃᑦᑕᕐᓂᖏᑦ. 

ᐃᓕᓐᓂᐊᕆᐊᖅᑐᑦ ᐊᐅᓪᓚᖅᐸᒃᑐᑦ ᑮᓇᐅᔭᖏᑦ ᓴᖅᑭᑎᑕᐅᓚᐅᖅᐳᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑕ ᖃᖓᑦᑕᐅᑎᒃᓴᖏᑦ ᐊᑭᓕᖅᑕᐅᖃᑦᑕᖁᓪᓗᒋᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᓐᓂ ᐃᓄᐃᑦ ᐊᑎᓕᐅᖅᑕᐅᕝᕕᖓᓂ [ᑕᐃᔭᐃᔪᑦ “ᐃᓄᐃᑦ” ᐊᓯᓕᒫᖏᓐᓂ ᒪᓕᒐᕐᓂ] ᐊᒻᒪ ᓄᓇᖓᑕ ᐊᓯᐊᓄᑦ ᐊᐅᓪᓚᕆᐊᖃᖅᖢᑎᒃ ᐃᖅᑲᓇᐃᔮᒥᓄᑦ ᐱᔾᔪᑎᖃᖅᖢᓂ ᐃᓕᓐᓂᐊᕆᐊᖅᑐᑦ.

ᑐᙵᕕᒋᓂᐊᖅᑕᖏᑦ

ᑖᓐᓇ ᐱᓕᕆᐊᖑᔪᖅ ᐅᑯᓂᖓ ᐃᓄᐃᑦ ᐅᒃᐱᕆᔭᖏᓐᓂᒃ ᒪᓕᖃᑦᑕᖅᐳᑦ:

• ᐱᓕᒻᒪᒃᓴᕐᓂᖅ/ᐱᔭᕆᐅᖅᓴᓂᖅ: ᐱᔪᓐᓇᖅᓯᕙᓪᓕᐊᓂᖅ ᑕᐅᑐᖕᓂᒃᑯᑦ, ᐅᖃᐅᔾᔪᖅᑕᐅᓂᒃᑯᑦ, ᐊᔪᕈᓐᓃᖅᓴᕐᓂᒃᑯᑦ ᐊᒻᒪ ᐱᓇᔪᖕᓂᒃᑯᑦ.
• ᐱᓕᕆᖃᑎᒌᖕᓂᖅ/ᐃᑲᔪᖅᑎᒌᖕᓂᖅ: ᐱᓕᕆᖃᑎᒌᖕᓂᖅ ᐱᔾᔪᑎᖃᑦᑎᐊᖅᖢᑎᒃ.
• ᖃᓄᖅᑑᕐᓂᖅ: ᓄᑖᓂᒃ ᐱᓇᓱᐊᕈᓐᓇᑦᑎᐊᕐᓂᖅ ᖃᓄᖅᑑᕈᓐᓇᕐᓗᓂᓗ. 

ᖃᓄᖅ ᑕᒪᓐᓇ ᐊᑐᖅᑕᐅᕙᒃᐸ?

ᑕᑯᒋᐊᕐᓂᖅ

ᐱᓕᕆᕝᕖᑦ ᐊᒻᒪ ᑎᒥᐅᔪᑦ [ᐊᑕᐅᑦᑎᒃᑯᑦ ᑕᐃᔭᐅᔪᑦ ᐃᒪᓐᓇ “ᒐᕙᒪᒃᑯᑦ ᐱᓕᕆᕝᕕᖓ” ᐊᓯᓕᒫᖏᓐᓂ ᒪᓕᒐᕐᓂ] ᒐᕙᒪᓕᕆᔨᒃᑯᓐᓄᑦ ᓯᕗᒻᒧᐊᖃᑎᒌᑦ ᐱᓕᕆᕝᕕᖓᓄᑦ ᐊᑐᖅᑕᐅᕗᑦ, ᑮᓇᐅᔭᓂᒃ ᐊᐅᓚᑦᑎᕙᒃᑐᓂᒃ. ᑖᒃᑯᐊ ᐱᓕᕆᕝᕖᑦ ᐅᑎᖅᑎᕝᕕᐅᖁᔨᖃᑦᑕᖅᐳᑦ ᖃᖓᑦᑕᐅᑎᖏᑕ ᐊᑭᖏᓐᓂᒃ ᓇᓗᓇᐃᖅᑕᖏᓐᓄᑦ ᐊᔪᙱᑎᑕᐅᔪᓄᑦ ᐃᓅᓪᓗᑎᒃ ᐃᖅᑲᓇᐃᔭᖅᑎᐅᔪᑦ ᐃᓕᓐᓂᐊᕆᐊᖅᖢᓂ ᐊᐅᓪᓚᕆᐊᖃᕐᓂᖓᓄᑦ. ᐱᓇᔪᒃᑐᖅ ᓇᓗᓇᐃᖅᓯᔭᕆᐊᖃᖅᐳᖅ ᐱᔪᓐᓇᑦᑎᑕᐅᓂᕐᒧᑦ ᐊᑐᕆᐊᓖᑦ ᒪᓕᒃᑕᐅᓂᖏᓐᓂᒃ ᐊᒻᒪ ᖃᖓᑦᑕᐅᑎᖓᑕ ᐊᑭᓕᐅᑎᖓᓂᒃ ᓇᓗᓇᐃᖅᓯᔾᔪᑎᓂᒃ ᑐᓂᓯᓗᓂ.

ᑮᓇᐅᔭᑦ ᖃᖓᑦᑕᐅᑎᓄᑦ ᐊᑭᓕᐅᑎᓄᑦ ᐅᑎᖅᑎᑦᑎᓂᐊᖅᐳᑦ ᒪᓕᒡᓗᒍ ᒪᓕᒋᐊᓖᑦ ᑎᓕᓯᔾᔪᑎᒥ 820-1 ᑮᓇᐅᔭᓂᒃ ᐊᐅᓚᑦᑎᓂᕐᒧᑦ ᐊᑐᖅᑕᐅᔭᕆᐊᓖᑦ: ᐱᓕᕆᔭᖅᑐᕐᓗᓂ ᐊᐅᓪᓚᕐᓂᖅ.    

ᐱᔪᓐᓇᖅᑎᑕᐅᔪᑦ

ᐃᖅᑲᓇᐃᔭᖅᑏᑦ ᐱᔪᓐᓇᖅᑎᑕᐅᔪᑦ:

• ᐃᓄᐃᑦ ᓇᓕᐊᖕᓂᑐᐃᓐᓇᖅ ᒐᕙᒪᒃᑯᑦ ᐱᓕᕆᕝᕕᖓᓂ ᐃᖅᑲᓇᐃᔭᖅᑐᑦ;
• ᓄᓇᕗᑦ ᒐᕙᒪᒃᑯᓐᓂ ᐃᖅᑲᓇᐃᔮᖅᑖᕈᒪᔪᖅ;
• ᓄᑖᙳᕆᐊᖅᓯᒪᔪᒥᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐸᕐᓇᐅᑎᖃᖅᑐᖅ (ᐃᖅᑲᓇᐃᔭᖅᑐᓕᕆᔨᒃᑯᑦ ᒪᒃᐱᖅᑐᒐᖓ 316−ᒥᑦ ᐱᓕᕆᑦᑎᐊᕐᓂᕐᒧᑦ ᐊᐅᓚᑦᑎᔾᔪᑎᒥᑦ);
• ᐃᖅᑲᓇᐃᔮᒃᓴᒧᑦ ᐱᔭᕇᕈᓐᓇᕐᓂᕐᒧᑦ ᑎᑎᕌᓂᒃᓯᒪᔪᒥᑦ ᐱᓯᒪᓗᓂ (CAR) ᐊᒻᒪ ᐃᖅᑲᓇᐃᔮᕆᔪᒪᔭᒥᓂᒃ ᐅᖃᖃᑎᖃᕐᓗᓂ ᐃᖅᑲᓇᐃᔮᓄᑦ ᐸᕐᓇᐃᔨᒻᒪᕆᖕᒧᑦ ᒐᕙᒪᓕᕆᔨᒃᑯᓐᓂ;
• ᐊᐅᓚᑦᑎᔨᒋᔭᒥᓄᑦ ᐃᑲᔪᖅᑐᖅᑕᐅᓗᓂ ᐃᓕᓐᓂᐊᖃᑕᐅᔪᓐᓇᕐᓂᕐᒧᑦ ᐊᒻᒪ ᐃᖅᑲᓇᐃᔮᒥᓄᑦ ᐃᓕᑉᐸᓪᓕᐊᓂᕐᒧᑦ ᐱᓕᕆᐊᒃᓴᓂᒃ ᐊᖏᕐᕋᖓᑕ ᐊᓯᐊᓂᒃ; ᐊᒻᒪᓗ
• ᐃᓕᓐᓂᐊᓚᐅᖅᓯᒪᓗᓂ ᐅᕝᕙᓘᓐᓃᑦ ᐃᖅᑲᓇᐃᔮᖅᑖᖅᐸᓪᓕᐊᓂᕐᒧᑦ ᐃᓕᓐᓂᐊᖅᓯᒪᓗᓂ ᐊᖏᕐᕋᖓᑕ ᐊᓯᐊᓂ.
• ᐃᓄᐃᑦ ᐃᖅᑲᓇᐃᔭᖅᑏᑦ ᐊᓯᖏᓐᓂᒃ ᓄᓇᕗᑦ ᒐᕙᒪᒃᑯᓐᓂ ᐃᖅᑲᓇᐃᔮᖅᑖᖅᐸᓪᓕᐊᓂᕐᒧᑦ ᐱᓕᕆᕙᓪᓕᐊᖃᑕᐅᔪᑦ ᐱᔪᓐᓇᖅᑎᑕᐅᖕᒥᔪᑦ.

ᐱᓕᕆᐊᒃᓴᖏᑦ ᑲᒪᒋᔭᒃᓴᖏᓪᓗ

ᐱᓕᕆᕝᕖᑦ:    

• ᐃᓄᐃᑦ ᐃᖅᑲᓇᐃᔭᖅᑏᑦ ᐋᖅᑭᒃᓱᐃᖁᓗᒋᑦ ᐃᖅᑲᓇᐃᔮᒃᓴᒧᑦ ᑐᕌᒐᖏᓐᓂᒃ ᐊᒻᒪ ᑕᒪᑐᒧᖓ ᑐᕌᖓᔪᒥᒃ ᐃᓕᓐᓂᐊᒃᑲᓐᓂᕋᓱᖕᓂᕐᒧᑦ;
• ᐃᓄᖕᓂᒃ ᐃᖅᑲᓇᐃᔭᖅᑎᓂᒃ ᐱᓕᕆᖃᑎᖃᕐᓗᓂ ᐃᓕᓐᓂᐊᕐᓂᕐᒧᑦ ᐊᒻᒪ ᐱᕙᓪᓕᐊᓂᕐᒧᑦ ᐸᕐᓇᐅᑎᓕᐅᕐᓗᑎᒃ;
• ᓇᓗᓇᐃᖅᓯᓗᓂ ᐃᖅᑲᓇᐃᔭᖅᑏᑦ ᑲᑎᖃᑎᖃᕆᐊᖃᕐᓂᖏᓐᓂᒃ ᐃᖅᑲᓇᐃᔭᖅᑎᑦ ᐸᕐᓇᐃᔨᒻᒪᕆᖓᓂᒃ ᐊᒻᒪ ᐃᖅᑲᓇᐃᔮᒃᓴᒧᑦ ᐱᔭᕇᕈᓐᓇᕐᓂᕐᒧᑦ ᑎᑎᕌᓂᒃᓯᒪᓗᓂ;
• ᐃᓕᓐᓂᐊᕈᑎᖓᑕ ᐊᑭᓕᐅᑎᒃᓴᖓᓂᒃ;
• ᐃᖅᑲᓇᐃᔭᖅᑎᐅᑉ ᖃᖓᑦᑕᐅᑎᒃᓴᖓᑕ ᐊᑭᓕᐅᑎᖓᓂᒃ ᐊᒻᒪ ᐊᑭᓕᐅᑕᐅᒃᑲᓐᓂᕐᓂᐊᖅᑐᒥᒃ;
• ᖃᖓᑦᑕᐅᑎᖏᑦ ᐊᑭᓕᖅᑕᐅᒃᑲᓐᓂᕐᓂᐊᖅᑐᑦ ᐃᓕᓐᓂᐊᕆᐊᕈᑎᒋᔭᖏᑦ ᐱᔪᓐᓇᖅᑎᑕᐅᔪᑦ ᐃᖅᑲᓇᐃᔭᖅᑎᑦ, ᐊᖏᖅᑕᐅᓯᒪᔪᒥᑦ ᐱᓕᕆᐊᒥᓄᑦ ᐸᕐᓇᐅᒻᒥᒃ ᒪᓕᒡᓗᑎᒃ ᐊᒻᒪ ᓂᕈᐊᕐᓂᖅ 4/5 ᑮᓇᐅᔭᑦ ᐱᓕᕆᕝᕕᖕᒥᓄᑦ ᓴᓂᕐᕙᒃᑕᐅᓯᒪᔪᑦ.
• ᐃᖅᑲᓇᐃᔭᖅᑎ ᐱᔪᓐᓇᖅᑎᑕᐅᓂᖓᓂᒃ ᑎᑎᕋᖅᓯᒪᔪᒥᑦ ᑐᓂᓯᓗᓂ; ᐊᒻᒪᓗ
• ᑎᑎᕋᖅᓯᒪᔪᓂᒃ ᑐᓂᓯᓗᓂ ᐊᑭᓕᖅᑕᐅᔪᓐᓇᖅᑐᓂᒃ.

ᐃᖅᑲᓇᐃᔭᖅᑎᑦ ᐱᔪᓐᓇᖅᑎᑕᐅᔪᑦ: 

• ᐃᖅᑲᓇᐃᔭᖅᑎᑦ ᐸᕐᓇᐃᔨᒻᒪᕆᖓᓂᒃ ᐱᓕᕆᖃᑎᖃᕐᓗᓂ ᐃᖅᑲᓇᐃᔮᒥᓄᑦ ᑐᕌᒐᖏᓐᓂᒃ, ᐃᓕᓐᓂᐊᕈᒪᔭᖏᓐᓂᒃ, ᐊᒻᒪ ᐃᓕᓐᓂᐊᕈᑎᒋᓂᐊᖅᑕᖏᓐᓂᒃ ᓇᓗᓇᐃᖅᓯᓗᑎᒃ, ᐊᒻᒪ ᐃᖅᑲᓇᐃᔮᒃᓴᒧᑦ ᐱᔭᕇᕈᓐᓇᕐᓂᕐᒧᑦ ᑎᑎᕋᕐᓗᓂ ᓄᑖᙳᕆᐊᖅᓯᓗᓂᓘᓐᓃᑦ;
• ᓇᓗᓇᐃᖅᓯᓗᓂ ᐃᓕᓐᓂᐊᖅᑕᐅᓂᐊᖅᑐᒥᒃ ᐃᖅᑲᓇᐃᔮᒥᓄᑦ ᐊᒻᒪ/ᐅᕝᕙᓘᓐᓃᑦ ᐃᖅᑲᓇᐃᔮᒃᓴᒥᓄᑦ ᑐᕌᒐᖏᓐᓂᒃ ᐊᒻᒪ ᐊᖓᔪᖅᑳᒥᓂᒃ ᐱᓕᕆᖃᑎᖃᕐᓗᓂ ᐃᓕᓐᓂᐊᕐᓂᕐᒧᑦ ᐊᒻᒪ ᐱᕙᓪᓕᐊᓂᕐᒧᑦ ᐸᕐᓇᐅᑎᓕᐅᕐᓗᑎᒃ;
• ᐊᖓᔪᖅᑳᒥᓄᑦ ᐱᓇᔪᒡᓗᓂ ᐃᓕᓐᓂᐊᕈᒪᔭᒥᓂᒃ; ᐊᒻᒪᓗ
• ᐃᓕᓐᓂᐊᖅᑕᓂ ᐱᐊᓂᒡᓗᒍ.

ᓯᕗᒻᒧᐊᖃᑎᒌᑦ ᐱᓕᕆᕝᕕᖓ, ᒐᕙᒪᓕᕆᔨᒃᑯᓐᓂ:

• ᐱᓕᕆᐊᒃᓴᒧᑦ ᐸᕐᓇᐅᑎᒧᑦ ᑮᓇᐅᔭᖅᑖᕋᓲᑎ ᕿᒥᕐᕈᓗᒋᑦ ᐱᓕᕆᕝᕕᖕᒥᙶᖅᑐᑦ
• ᓴᓂᕐᕙᐃᓗᑎᒃ ᐊᑭᓕᖅᓯᓗᑎᒡᓗ ᐱᓕᕆᕝᕕᖕᓂ ᐃᓕᓐᓂᐊᕆᐊᖅᑐᑦ ᖃᖓᑦᑕᐅᑎᒃᓴᖏᓐᓄᑦ ᐱᔪᓐᓇᖅᑎᑕᐅᔪᑦ ᐃᖅᑲᓇᐃᔭᖅᑎᓄᑦ.
• ᐅᓂᒃᑲᐅᓯᕆᓗᒋᑦ ᑮᓇᐅᔭᑦ ᐊᑐᖅᑕᐅᔪᑦ ᐱᔪᓐᓇᕐᓂᖅᑖᖅᐸᓪᓕᐊᑎᑦᑎᓂᕐᒧᑦ ᑲᑎᒪᔨᕋᓛᓄᑦ ᐊᒻᒪ ᓯᕗᓪᓕᐅᑎᑕᐅᔪᒪᔪᓂᒃ ᐊᑐᓕᖅᑎᑦᑎᓗᑎᒃ ᐊᒻᒪ/ᐅᕝᕙᓘᓐᓃᑦ ᐱᓕᕆᐊᖑᓂᐊᖅᑐᓄᑦ ᑭᒡᓕᒋᑎᑕᐅᔪᑦ.